na harif-e-jaan na sharik-e-gham shab-e-intizar koi to ho

na harīf-e-jāñ na sharīk-e-ġham shab-e-intizār koī to ho

kise bazm-e-shauq meñ laa.eñ ham dil-e-be-qarār koī to ho

kise zindagī hai aziiz ab kise ārzū-e-shab-e-tarab

magar ai nigār-e-vafā talab tirā e'tibār koī to ho

kahīñ tār-e-dāman-e-gul mile to ye maan leñ ki chaman khile

ki nishān fasl-e-bahār kā sar-e-shāḳh-sār koī to ho

ye udaas udaas se baam o dar ye ujaaḌ ujaaḌ sī rah-guzar

chalo ham nahīñ na sahī magar sar-e-kū-e-yār koī to ho

ye sukūn-e-jāñ kī ghaḌī Dhale to charāġh-e-dil hī na bujh chale

vo balā se ho ġham-e-ishq yā ġham-e-rozgār koī to ho

sar-e-maqtal-e-shab-e-ārzū rahe kuchh to ishq kī aabrū

jo nahīñ adū to 'farāz' tū ki nasīb-e-dār koī to ho

na harif-e-jaan na sharik-e-gham shab-e-intizar koi to ho

kise bazm-e-shauq mein laen hum dil-e-be-qarar koi to ho

kise zindagi hai aziz ab kise aarzu-e-shab-e-tarab

magar ai nigar-e-wafa talab tera e'tibar koi to ho

kahin tar-e-daman-e-gul mile to ye man len ki chaman khile

ki nishan fasl-e-bahaar ka sar-e-shaKH-sar koi to ho

ye udas udas se baam o dar ye ujaD ujaD si rah-guzar

chalo hum nahin na sahi magar sar-e-ku-e-yar koi to ho

ye sukun-e-jaan ki ghaDi Dhale to charagh-e-dil hi na bujh chale

wo bala se ho gham-e-ishq ya gham-e-rozgar koi to ho

sar-e-maqtal-e-shab-e-arzu rahe kuchh to ishq ki aabru

jo nahin adu to 'faraaz' tu ki nasib-e-dar koi to ho