na ho eajaz kyon husn-e-bayan mein

na ho e.ajāz kyoñ husn-e-bayāñ meñ

tumhīñ tum ho hamārī dāstāñ meñ

chaman meñ dasht meñ kū-e-butāñ meñ

mirī vahshat huī rusvā jahāñ meñ

sabab merī taḌap kā kuchh na pūchho

ki ik nashtar hai yād-e-raftagāñ meñ

ye jiinā bhī koī jiinā hai apnā

qafas meñ ham haiñ dil hai āshiyāñ meñ

kahīñ bijlī kahīñ hai ātish-e-gul

charāġhāñ kā samāñ hai gulsitāñ meñ

jo tum chāho tabassum se badal do

abhī hai itnī gunjā.ish fuġhāñ meñ

hayāt-e-ishq kā hāsil hai goyā

jo harf-e-ġham hai merī dāstāñ meñ

tire naġhmoñ kā jaadū allah allāh

ki gul khilne lage fasl-e-ḳhizāñ meñ

sukūn un kā hai mere zabt-e-ġham se

baḌī tāsīr hai varna fuġhāñ meñ

ta.ajjub hai ki ik do rahnumā bhī

nahīñ is kārvāñ dar kārvāñ meñ

zamīñ ke ho ga.e paivand lākhoñ

havā-e-māvrā-e-āsmāñ meñ

ajīran ho ga.ī umr-e-do-roza

tamanna-e-hayāt-e-jāvedāñ meñ

sunāo āp-bītī ai 'sa.ādat'

dharā kyā hai hadīs-e-dīgarāñ meñ

na ho eajaz kyon husn-e-bayan mein

tumhin tum ho hamari dastan mein

chaman mein dasht mein ku-e-butan mein

meri wahshat hui ruswa jahan mein

sabab meri taDap ka kuchh na puchho

ki ek nashtar hai yaad-e-raftagan mein

ye jina bhi koi jina hai apna

qafas mein hum hain dil hai aashiyan mein

kahin bijli kahin hai aatish-e-gul

charaghan ka saman hai gulsitan mein

jo tum chaho tabassum se badal do

abhi hai itni gunjaish fughan mein

hayat-e-ishq ka hasil hai goya

jo harf-e-gham hai meri dastan mein

tere naghmon ka jadu allah allah

ki gul khilne lage fasl-e-KHizan mein

sukun un ka hai mere zabt-e-gham se

baDi tasir hai warna fughan mein

tajjub hai ki ek do rahnuma bhi

nahin is karwan dar karwan mein

zamin ke ho gae paiwand lakhon

hawa-e-mawra-e-asman mein

ajiran ho gai umr-e-do-roza

tamanna-e-hayat-e-jawedan mein

sunao aap-biti ai 'saadat'

dhara kya hai hadis-e-digaran mein