na hoga hashr mahshar mein bapa kya

na hogā hashr mahshar meñ bapā kyā

na hogā merā un kā faisla kyā

daġhā degā mujhe vo pur-jafā kyā

na aaḌe aa.egī merī vafā kyā

chaman meñ kis liye gul hañs rahe haiñ

shagūfa tū ne chhoḌā ai sabā kyā

chalo bigḌo na mah kahne par itnā

bashar se ho nahīñ jaatī ḳhatā kyā

unheñ tark-e-ta.alluq hai jo manzūr

mujhe ilzām dete haiñ vo kyā kyā

vo kab kā bah gayā sab ḳhuun ho kar

lagā.egā koī dil kā patā kyā

kiyā hai vāda-e-fardā kisī ne

na hogī ab qayāmat bhī bapā kyā

ḳhudā kī bhī nahīñ sunte haiñ ye but

bhalā maiñ kyā huuñ merī iltijā kyā

jafāoñ ke liye kī thiiñ vafā.eñ

natīja dostī kā hai daġhā kyā

unhīñ kī sī ye dil bhī kah rahā hai

misāl-e-chashm-e-jānāñ phir gayā kyā

ajab andāz se niklā mirā dam

adā-e-yār thī merī qazā kyā

manāne se nahīñ mantā jo koī

hamārā dam ḳhafā hotā hai kyā kyā

diye dukh bhī to jī bhar ke na ham ko

falak tū kyā hai terā hausla kyā

daġhā dī ham ko dil le kar hamārā

yahī jurm-e-vafā kī thī sazā kyā

mujhe kyuuñ aaj hichkī aa rahī hai

koī yaad aa.ī aur un ko jafā kyā

kareñ shikva na sāhab dahr kā bhī

zamāne meñ tumhīñ ho bevafā kyā

shab-e-furqat daġhā dī zabt ne bhī

dilā sach hai kisī kā aasrā kyā

vo be-ḳhud pā ke 'zebā' ko ye bole

dil aayā aap kā merā gayā kyā

na hoga hashr mahshar mein bapa kya

na hoga mera un ka faisla kya

dagha dega mujhe wo pur-jafa kya

na aaDe aaegi meri wafa kya

chaman mein kis liye gul hans rahe hain

shagufa tu ne chhoDa ai saba kya

chalo bigDo na mah kahne par itna

bashar se ho nahin jati KHata kya

unhen tark-e-talluq hai jo manzur

mujhe ilzam dete hain wo kya kya

wo kab ka bah gaya sab KHun ho kar

lagaega koi dil ka pata kya

kiya hai wada-e-farda kisi ne

na hogi ab qayamat bhi bapa kya

KHuda ki bhi nahin sunte hain ye but

bhala main kya hun meri iltija kya

jafaon ke liye ki thin wafaen

natija dosti ka hai dagha kya

unhin ki si ye dil bhi kah raha hai

misal-e-chashm-e-jaanan phir gaya kya

ajab andaz se nikla mera dam

ada-e-yar thi meri qaza kya

manane se nahin manta jo koi

hamara dam KHafa hota hai kya kya

diye dukh bhi to ji bhar ke na hum ko

falak tu kya hai tera hausla kya

dagha di hum ko dil le kar hamara

yahi jurm-e-wafa ki thi saza kya

mujhe kyun aaj hichki aa rahi hai

koi yaad aai aur un ko jafa kya

karen shikwa na sahab dahr ka bhi

zamane mein tumhin ho bewafa kya

shab-e-furqat dagha di zabt ne bhi

dila sach hai kisi ka aasra kya

wo be-KHud pa ke 'zeba' ko ye bole

dil aaya aap ka mera gaya kya