na hua nasib qarar-e-jaan hawas-e-qarar bhi ab nahin

na huā nasīb qarār-e-jāñ havas-e-qarār bhī ab nahīñ

tirā intizār bahut kiyā tirā intizār bhī ab nahīñ

tujhe kyā ḳhabar mah-o-sāl ne hameñ kaise zaḳhm diye yahāñ

tirī yādgār thī ik ḳhalish tirī yādgār bhī ab nahīñ

na gile rahe na gumāñ rahe na guzārisheñ haiñ na guftugū

vo nishāt-e-vāda-e-vasl kyā hameñ e’tibār bhī ab nahīñ

rahe nām-e-rishta-e-raftgāñ na shikāyateñ haiñ na shoḳhiyāñ

koī 'uzr-ḳhvāh to ab kahāñ koī uzr-dār bhī ab nahīñ

kise nazr deñ dil-o-jāñ baham ki nahīñ vo kākul-e-ḳham-ba-ḳham

kise har-nafas kā hisāb deñ ki shamīm-e-yār bhī ab nahīñ

vo hujūm-e-dil-zadagāñ ki thā tujhe muzhda ho ki bikhar gayā

tire āstāne kī ḳhair ho sar-e-rah-e-ġhubār bhī ab nahīñ

vo jo apnī jaañ se guzar ga.e unheñ kyā ḳhabar hai ki shahr meñ

kisī jāñ-nisār kā zikr kyā koī sogvār bhī ab nahīñ

nahīñ ab to ahl-e-junūñ meñ bhī vo jo shauq-e-shahr meñ 'aam thā

vo jo rang thā kabhī kū-ba-kū sar-e-kū-e-yār bhī ab nahīñ

na hua nasib qarar-e-jaan hawas-e-qarar bhi ab nahin

tera intizar bahut kiya tera intizar bhi ab nahin

tujhe kya KHabar mah-o-sal ne hamein kaise zaKHm diye yahan

teri yaadgar thi ek KHalish teri yaadgar bhi ab nahin

na gile rahe na guman rahe na guzarishen hain na guftugu

wo nishat-e-wada-e-wasl kya hamein e’tibar bhi ab nahin

rahe nam-e-rishta-e-raftgan na shikayaten hain na shoKHiyan

koi 'uzr-KHwah to ab kahan koi uzr-dar bhi ab nahin

kise nazr den dil-o-jaan baham ki nahin wo kakul-e-KHam-ba-KHam

kise har-nafas ka hisab den ki shamim-e-yar bhi ab nahin

wo hujum-e-dil-zadagan ki tha tujhe muzhda ho ki bikhar gaya

tere aastane ki KHair ho sar-e-rah-e-ghubar bhi ab nahin

wo jo apni jaan se guzar gae unhen kya KHabar hai ki shahr mein

kisi jaan-nisar ka zikr kya koi sogwar bhi ab nahin

nahin ab to ahl-e-junun mein bhi wo jo shauq-e-shahr mein 'am tha

wo jo rang tha kabhi ku-ba-ku sar-e-ku-e-yar bhi ab nahin