na intizar mein yan aankh ek aan lagi

na intizār meñ yaañ aañkh ek aan lagī

na haa.e haa.e meñ taalū se shab zabān lagī

jalā jigar tap-e-ġham se phaḌakne jaan lagī

ilāhī ḳhair ki ab aag paas aan lagī

galī meñ us kī na phir aate ham to kyā karte

tabī.at apnī na jannat ke darmiyān lagī

jafā-e-ġhair kā shikva thā terā thā kyā zikr

abas ye baat burī tujh ko bad-gumān lagī

hañso na tum to mire haal par maiñ huuñ vo zalīl

ki jis kī zillat-o-ḳhvārī se tum ko shaan lagī

kahāñ vo āh-o-fuġhāñ dam bhī le nahīñ sakte

hameñ ye terī duā-e-bad āsmān lagī

maiñ aur us ko bulā.ūñgā roz-e-vasl meñ lo

ajal bhī karne mohabbat kā imtihān lagī

ba-rañg-e-sūrat-e-bulbul nahīñ navā-sanjī

ye kyā huā ki chup ai gulsitāñ bayān lagī

sadā tumhārī taraf jī lagā hī rahtā hai

tumhāre vāste hai dil ko mehrbān lagī

vo kīna-tūz thā 'momin' to dil lagāyā kyuuñ

kaho to kyā tumheñ aisī bhalī vo aan lagī

na intizar mein yan aankh ek aan lagi

na hae hae mein talu se shab zaban lagi

jala jigar tap-e-gham se phaDakne jaan lagi

ilahi KHair ki ab aag pas aan lagi

gali mein us ki na phir aate hum to kya karte

tabiat apni na jannat ke darmiyan lagi

jafa-e-ghair ka shikwa tha tera tha kya zikr

abas ye baat buri tujh ko bad-guman lagi

hanso na tum to mere haal par main hun wo zalil

ki jis ki zillat-o-KHwari se tum ko shan lagi

kahan wo aah-o-fughan dam bhi le nahin sakte

hamein ye teri dua-e-bad aasman lagi

main aur us ko bulaunga roz-e-wasl mein lo

ajal bhi karne mohabbat ka imtihan lagi

ba-rang-e-surat-e-bulbul nahin nawa-sanji

ye kya hua ki chup ai gulsitan bayan lagi

sada tumhaari taraf ji laga hi rahta hai

tumhaare waste hai dil ko mehrban lagi

wo kina-tuz tha 'momin' to dil lagaya kyun

kaho to kya tumhein aisi bhali wo aan lagi