na jaane kab badal jae muqaddar dekh lete hain

na jaane kab badal jaa.e muqaddar dekh lete haiñ

tujhe ai zindagī chal aazmā kar dekh lete haiñ

'azāboñ se guzar kar ye hunar utrā hai āñkhoñ meñ

ki ham qatre meñ bhī pinhāñ samundar dekh lete haiñ

mire bachche khilaunoñ ke liye bhī zid nahīñ karte

kahāñ tak paañv phailāne haiñ chādar dekh lete haiñ

zamīñ kam hai hamāre ḳhvāb kī vus'at ziyāda hai

chalo phir ḳhvāb kā naqsha badal kar dekh lete haiñ

ye ham par dostoñ kī mehrbānī hai ki ab ham bhī

chhupe haiñ āstīnoñ meñ jo ḳhanjar dekh lete haiñ

ye lāzim to nahīñ mīnār se sab kuchh dikhā.ī de

vahāñ se jo nahīñ dikhtā qalandar dekh lete haiñ

abhī tak yaad haiñ in ko sitam zill-e-ilāhī ke

inheñ be-jān mat kahnā ye patthar dekh lete haiñ

bahut pyāse hoñ ye phir bhī har ik chhat par nahīñ jaate

kahāñ bartan meñ paanī hai kabūtar dekh lete haiñ

na jaane kab badal jae muqaddar dekh lete hain

tujhe ai zindagi chal aazma kar dekh lete hain

'azabon se guzar kar ye hunar utra hai aankhon mein

ki hum qatre mein bhi pinhan samundar dekh lete hain

mere bachche khilaunon ke liye bhi zid nahin karte

kahan tak panw phailane hain chadar dekh lete hain

zamin kam hai hamare KHwab ki wus'at ziyaada hai

chalo phir KHwab ka naqsha badal kar dekh lete hain

ye hum par doston ki mehrbani hai ki ab hum bhi

chhupe hain aastinon mein jo KHanjar dekh lete hain

ye lazim to nahin minar se sab kuchh dikhai de

wahan se jo nahin dikhta qalandar dekh lete hain

abhi tak yaad hain in ko sitam zill-e-ilahi ke

inhen be-jaan mat kahna ye patthar dekh lete hain

bahut pyase hon ye phir bhi har ek chhat par nahin jate

kahan bartan mein pani hai kabutar dekh lete hain