na junun jaega kabhi mera

na junūñ jā.egā kabhī merā

yaar hai ġhairat-e-parī merā

dil na le ai sanam barā-e-ḳhudā

kuchh bahaltā hai is se jī merā

us kā hairān huuñ jo kahtā hai

dekh le muñh na aarsī merā

ab nahīñ dil ko taab furqat kī

dam nikaltā hai ai parī merā

lazzat-e-qatl kyā kahūñ qātil

chāTtī hai lahū chhurī merā

jān-e-jāñ zikr kar na jaane kā

dam nikal jā.egā abhī merā

ġhuncha-e-gul to hañs ke kahtā hai

muñh chiḌhāne lagī kalī merā

ab kī furqat meñ gar rahā jiitā

dekhiyegā na muñh kabhī merā

be-nishāñ hoñ misāl anqā kī

naam ai 'arsh' to sahī merā

na junun jaega kabhi mera

yar hai ghairat-e-pari mera

dil na le ai sanam bara-e-KHuda

kuchh bahalta hai is se ji mera

us ka hairan hun jo kahta hai

dekh le munh na aarsi mera

ab nahin dil ko tab furqat ki

dam nikalta hai ai pari mera

lazzat-e-qatl kya kahun qatil

chaTti hai lahu chhuri mera

jaan-e-jaan zikr kar na jaane ka

dam nikal jaega abhi mera

ghuncha-e-gul to hans ke kahta hai

munh chiDhane lagi kali mera

ab ki furqat mein gar raha jita

dekhiyega na munh kabhi mera

be-nishan hon misal anqa ki

nam ai 'arsh' to sahi mera