na karta zabt main nala to phir aisa dhuan hota

na kartā zabt maiñ naala to phir aisā dhuāñ hotā

ki nīche āsmāñ ke aur paidā āsmāñ hotā

kahe hai murġh-e-dil ai kaash meñ zāġh-e-kamāñ hotā

ki tā shāḳh-e-kamāñ par us kī merā āshiyāñ hotā

abhī kyā sard qātil ye shahīd-e-tufta-jāñ hotā

koī dam sham-e-murda meñ bhī hai baaqī dhuāñ hotā

na hotī dil meñ kāvish gar kisī kī nok-e-mizhgāñ kī

to kyuuñ haq meñ mire har mū-e-tan misl-e-sināñ hotā

azā-dārī meñ hai kis kī ye charḳh-e-mātamī-jāma

ki habīb-e-chāk kī sūrat hai ḳhatt-e-kahkahshāñ hotā

bagūlā gar na hotā vādi-e-vahshat meñ ai majnūñ

to gumbad ham se sar-gashtoñ kī turbat par kahāñ hotā

jo rotā khol kar dil tañgnā-e-dahr meñ āshiq

to jū-e-kahkashāñ meñ bhī falak par ḳhuuñ ravāñ hotā

na rakhtā gar na rakhtā muñh pe ye daanā marīz-e-ġham

magar terā mayassar bosa-e-ḳhāl-e-dahāñ hotā

tire ḳhūnīñ jigar kī ḳhaak par hotā agar sabza

to mizhgāñ kī tarah us se bhī paiham ḳhuuñ ravāñ hotā

rukāvaT dil kī us kāfir ke vaqt-e-zab.h zāhir hai

ki ḳhanjar merī gardan par hai ruk ruk kar ravāñ hotā

na kartā zabt maiñ girya to ai 'zauq' ik ghaḌī bhar meñ

kaTore kī tarah ghaḌiyāl ke ġharq āsmāñ hotā

na karta zabt main nala to phir aisa dhuan hota

ki niche aasman ke aur paida aasman hota

kahe hai murgh-e-dil ai kash mein zagh-e-kaman hota

ki ta shaKH-e-kaman par us ki mera aashiyan hota

abhi kya sard qatil ye shahid-e-tufta-jaan hota

koi dam sham-e-murda mein bhi hai baqi dhuan hota

na hoti dil mein kawish gar kisi ki nok-e-mizhgan ki

to kyun haq mein mere har mu-e-tan misl-e-sinan hota

aza-dari mein hai kis ki ye charKH-e-matami-jama

ki habib-e-chaak ki surat hai KHatt-e-kahkahshan hota

bagula gar na hota wadi-e-wahshat mein ai majnun

to gumbad hum se sar-gashton ki turbat par kahan hota

jo rota khol kar dil tangna-e-dahr mein aashiq

to ju-e-kahkashan mein bhi falak par KHun rawan hota

na rakhta gar na rakhta munh pe ye dana mariz-e-gham

magar tera mayassar bosa-e-KHal-e-dahan hota

tere KHunin jigar ki KHak par hota agar sabza

to mizhgan ki tarah us se bhi paiham KHun rawan hota

rukawaT dil ki us kafir ke waqt-e-zabh zahir hai

ki KHanjar meri gardan par hai ruk ruk kar rawan hota

na karta zabt main girya to ai 'zauq' ek ghaDi bhar mein

kaTore ki tarah ghaDiyal ke gharq aasman hota