na khincho aashiq-tishna-jigar ke tir pahlu se

na khīñcho āshiq-tishna-jigar ke tiir pahlū se

nikāle par hai misl-e-māhi-e-tasvīr pahlū se

na le ai nāvak-afgan dil ko mere chiir pahlū se

ki vo to jā chukā saath aah ke juuñ tiir pahlū se

dil-e-sīpāra ko le Taañk tāvīzoñ meñ haikal ke

na sarkā ye hamā.il ai but-e-be-pīr pahlū se

vo hoñ be-dast-o-pā bismil rasā.ī jab na haath aa.ī

kiyā tā pā-e-qātil az tah-e-shamshīr pahlū se

asīr-e-zulf dīvāne haiñ dekh ai pāsbāñ shab ko

dabā kar baiTh un ke paañv kī zanjīr pahlū se

musavvir lailā o majnūñ kī nākāmī pe hairāñ haiñ

kabhī baiThā na mil kar pahlū-e-tasvīr pahlū se

ye dil lab-tishna teġh-e-yār kā hai raat bhar kartā

sadā-e-al-ātish juuñ nāla-e-shab-gīr pahlū se

ajab hasrat kā aalam thā ki majnūñ kahtā thā paiham

chhuTe pahlū mire mahmil kā yā taqdīr pahlū se

na kahnā ustuḳhvāñ un ko ye aalam lāġharī kā hai

ki hai dikhlā rahā merā dil-e-dil-gīr pahlū se

ḳhayāl-e-abru-e-jānāñ nahīñ ab bhūltā ik dam

sipāhī hai judā kartā nahīñ shamshīr pahlū se

tamām ahl-e-suḳhan bazm-e-suḳhan meñ 'zauq' hairāñ haiñ

milā jo qāfiya tū ne kiyā tahrīr pahlū se

na khincho aashiq-tishna-jigar ke tir pahlu se

nikale par hai misl-e-mahi-e-taswir pahlu se

na le ai nawak-afgan dil ko mere chir pahlu se

ki wo to ja chuka sath aah ke jun tir pahlu se

dil-e-sipara ko le Tank tawizon mein haikal ke

na sarka ye hamail ai but-e-be-pir pahlu se

wo hon be-dast-o-pa bismil rasai jab na hath aai

kiya ta pa-e-qatil az tah-e-shamshir pahlu se

asir-e-zulf diwane hain dekh ai pasban shab ko

daba kar baiTh un ke panw ki zanjir pahlu se

musawwir laila o majnun ki nakaami pe hairan hain

kabhi baiTha na mil kar pahlu-e-taswir pahlu se

ye dil lab-tishna tegh-e-yar ka hai raat bhar karta

sada-e-al-atish jun nala-e-shab-gir pahlu se

ajab hasrat ka aalam tha ki majnun kahta tha paiham

chhuTe pahlu mere mahmil ka ya taqdir pahlu se

na kahna ustuKHwan un ko ye aalam laghari ka hai

ki hai dikhla raha mera dil-e-dil-gir pahlu se

KHayal-e-abru-e-jaanan nahin ab bhulta ek dam

sipahi hai juda karta nahin shamshir pahlu se

tamam ahl-e-suKHan bazm-e-suKHan mein 'zauq' hairan hain

mila jo qafiya tu ne kiya tahrir pahlu se