na koi nam o nasab hai na goshwara mera

na koī naam o nasab hai na goshvāra mirā

bas apnī āb-o-havā hī pe hai guzāra mirā

mirī zamīñ pe tire āftāb raushan haiñ

tire falak pe chamaktā hai ik sitāra mirā

jo chāhtā hai vo tasḳhīr kar le duniyā ko

kisī bhī shai pe nahīñ hai yahāñ ijāra mirā

maiñ ham-kanār huā ek lahar se aur phir

kināre hī meñ kahīñ gum huā kināra mirā

bas ek lamhā-e-benām kī giraft meñ haiñ

na jaane kaisā ta.alluq hai ye tumhārā mirā

to phir jo nafā hai maiñ us meñ kyuuñ nahīñ shāmil

agar yahāñ kā ḳhasāra hai sab ḳhasāra mirā

jo dhyān tak nahīñ detā hai merī bātoñ par

samajh rahā hai vahī shaḳhs to ishāra mirā

kahīñ ḳhushī kī numā.ish meñ rakh diyā jā kar

kal us ne basta-e-ġham taaq se utārā mirā

vahī hai til vahī ruḳhsār haiñ vahī tū hai

magar nahīñ hai samarqand aur buḳhārā mirā

maiñ baad o bārāñ se ātish kashīd kartā huuñ

ki aab o ḳhaak kī tamsīl hai idāra mirā

ab aa gayā huuñ to sochā sadā lagātā chalūñ

kise ḳhabar yahāñ aanā na ho dobāra mirā

darūn-e-ḳhāna koī bhī nahīñ kisī kā 'salīm'

pe dekhne meñ to lagtā hai shahr saarā mirā

na koi nam o nasab hai na goshwara mera

bas apni aab-o-hawa hi pe hai guzara mera

meri zamin pe tere aaftab raushan hain

tere falak pe chamakta hai ek sitara mera

jo chahta hai wo tasKHir kar le duniya ko

kisi bhi shai pe nahin hai yahan ijara mera

main ham-kanar hua ek lahar se aur phir

kinare hi mein kahin gum hua kinara mera

bas ek lamha-e-benam ki giraft mein hain

na jaane kaisa talluq hai ye tumhaara mera

to phir jo nafa hai main us mein kyun nahin shamil

agar yahan ka KHasara hai sab KHasara mera

jo dhyan tak nahin deta hai meri baaton par

samajh raha hai wahi shaKHs to ishaara mera

kahin KHushi ki numaish mein rakh diya ja kar

kal us ne basta-e-gham taq se utara mera

wahi hai til wahi ruKHsar hain wahi tu hai

magar nahin hai samarqand aur buKHara mera

main baad o baran se aatish kashid karta hun

ki aab o KHak ki tamsil hai idara mera

ab aa gaya hun to socha sada lagata chalun

kise KHabar yahan aana na ho dobara mera

darun-e-KHana koi bhi nahin kisi ka 'salim'

pe dekhne mein to lagta hai shahr sara mera