na koi naqsh na paikar sarab chaaron taraf

na koī naqsh na paikar sarāb chāroñ taraf

tamām dasht asīr-e-azāb chāroñ taraf

masīh-e-vaqt ab aa.e to bas ḳhudā aa.e

payambaroñ kī zamīñ aur azaab chāroñ taraf

maiñ bīchoñ-bīch khaḌā huuñ sulagte jañgal meñ

hisār bāñdhe hue āftāb chāroñ taraf

hamāre naam likhī jā chukī thī rusvā.ī

hameñ to honā thā yuuñ bhī ḳharāb chāroñ taraf

fasīl-e-dard se yādoñ kī dhuup Dhaltī huī

bikharte TūTte rañgoñ kā ḳhvāb chāroñ taraf

'mujībī' kam nahīñ 'fikrī' kī dostī kī panāh

agarche dushman-e-jāñ be-hisāb chāroñ taraf

na koi naqsh na paikar sarab chaaron taraf

tamam dasht asir-e-azab chaaron taraf

masih-e-waqt ab aae to bas KHuda aae

payambaron ki zamin aur azab chaaron taraf

main bichon-bich khaDa hun sulagte jangal mein

hisar bandhe hue aaftab chaaron taraf

hamare nam likhi ja chuki thi ruswai

hamein to hona tha yun bhi KHarab chaaron taraf

fasil-e-dard se yaadon ki dhup Dhalti hui

bikharte TuTte rangon ka KHwab chaaron taraf

'mujibi' kam nahin 'fikri' ki dosti ki panah

agarche dushman-e-jaan be-hisab chaaron taraf