na kuredūñ ishq ke raaz ko mujhe ehtiyāt-e-kalām hai
mirā zauq itnā buland hai jahāñ aarzū bhī harām hai
faqat ek rishta-e-mushtarak ḳhalish-e-sukūt-e-kalām hai
yūñhī ik zamāna guzar gayā na payām hai na salām hai
jo charāġh-e-ashk nasīb the vahī sabr kar ke jalā diye
vahī kāfirāna siyāhiyāñ ye vahī bujhī huī shaam hai
abhī rakkhā rahne do taaq par yūñhī āftāb kā aa.ina
ki abhī to merī nigāh meñ vahī merā māh-e-tamām hai
mirā har nafas mirī har nazar hai razā-e-ġhair pe munhasir
jo isī kā naam hayāt hai to hayāt marg-e-davām hai
yahī mai-kada kā ḳhulāsa hai yahī mastiyoñ kā nichoḌ bhī
tirī chashm-e-bāda-farosh meñ ye jo ek kaif-e-tamām hai
mirī hasratoñ kā na ḳhuun kar nahīñ yuuñ na rok mirī zabāñ
mirī sard aah pe shak na kar ye to merā husn-e-kalām hai
baḌī dil-ḳharāsh sadā thī vo ki binā-e-mai-kada hil ga.ī
ye shikast-e-tauba hai dekhtā ki shikasta-e-shīsha-o-jām hai
hai vahī fareb-e-dil-o-nazar abhī kārobār-e-hayāt meñ
vahī ek laġhzish-e-ḳhuld hai jo yahāñ bhī gām-ba-gām hai
zarā dekhnā to azaan kā bhī 'sirāj' vaqt nahīñ rahā
ye tulū-e-mahr hai yā vahī kaf-e-gul-farosh pe jaam hai
na kuredun ishq ke raaz ko mujhe ehtiyat-e-kalam hai
mera zauq itna buland hai jahan aarzu bhi haram hai
faqat ek rishta-e-mushtarak KHalish-e-sukut-e-kalam hai
yunhi ek zamana guzar gaya na payam hai na salam hai
jo charagh-e-ashk nasib the wahi sabr kar ke jala diye
wahi kafirana siyahiyan ye wahi bujhi hui sham hai
abhi rakkha rahne do taq par yunhi aaftab ka aaina
ki abhi to meri nigah mein wahi mera mah-e-tamam hai
mera har nafas meri har nazar hai raza-e-ghair pe munhasir
jo isi ka nam hayat hai to hayat marg-e-dawam hai
yahi mai-kada ka KHulasa hai yahi mastiyon ka nichoD bhi
teri chashm-e-baada-farosh mein ye jo ek kaif-e-tamam hai
meri hasraton ka na KHun kar nahin yun na rok meri zaban
meri sard aah pe shak na kar ye to mera husn-e-kalam hai
baDi dil-KHarash sada thi wo ki bina-e-mai-kada hil gai
ye shikast-e-tauba hai dekhta ki shikasta-e-shisha-o-jam hai
hai wahi fareb-e-dil-o-nazar abhi karobar-e-hayat mein
wahi ek laghzish-e-KHuld hai jo yahan bhi gam-ba-gam hai
zara dekhna to azan ka bhi 'siraj' waqt nahin raha
ye tulu-e-mahr hai ya wahi kaf-e-gul-farosh pe jam hai
Source:
Shola-e-Aawaz (Pg. e-85 p-84)
-
Author:
Siraj Lakhnavi
-
- Edition: 1920
- Publisher: Nizami Press, Lucknow
- Year of Publication: 1920
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.