na lewe gar KHas-e-jauhar tarawat sabza-e-KHat se

na leve gar ḳhas-e-jauhar tarāvat sabza-e-ḳhat se

lagā.e ḳhāna-e-ā.īna meñ rū-e-nigār ātish

faroġh-e-husn se hotī hai hall-e-mushkil-e-āshiq

na nikle sham.a ke pā se nikāle gar na ḳhaar ātish

sharar hai rañg ba.ad iz.hār-e-tāb-e-jalva-e-tamkīñ

kare hai sañg par ḳhurshīd āb-e-rū-e-kār ātish

panāve be-gudāz-e-mom rabt-e-paikar-ārā.ī

nikāle kyā nihāl-e-sham.a be-tuḳhm-e-sharār ātish

ḳhayāl-e-dūd thā sar-josh-e-saudā-e-ġhalat-fahmī

agar rakhtī na ḳhākistar-nashīnī kā ġhubār ātish

havā-e-par-fishānī barq-e-ḳhirman-hā-e-ḳhātir hai

ba-bāl-e-sho.ala-e-betāb hai parvāna-zār ātish

nahīñ barq-o-sharar juz vahshat-e-zabt-e-tapīdan-hā

bilā gardān-e-be-parvā ḳharāmī-hā-e-yār ātish

dhueñ se aag ke ik abr-e-dariyā-bār ho paidā

'asad' haidar-parastoñ se agar hove do-chār ātish

na lewe gar KHas-e-jauhar tarawat sabza-e-KHat se

lagae KHana-e-aina mein ru-e-nigar aatish

farogh-e-husn se hoti hai hall-e-mushkil-e-ashiq

na nikle shama ke pa se nikale gar na KHar aatish

sharar hai rang baad izhaar-e-tab-e-jalwa-e-tamkin

kare hai sang par KHurshid aab-e-ru-e-kar aatish

panawe be-gudaz-e-mom rabt-e-paikar-arai

nikale kya nihaal-e-shama be-tuKHm-e-sharar aatish

KHayal-e-dud tha sar-josh-e-sauda-e-ghalat-fahmi

agar rakhti na KHakistar-nashini ka ghubar aatish

hawa-e-par-fishani barq-e-KHirman-ha-e-KHatir hai

ba-baal-e-shoala-e-betab hai parwana-zar aatish

nahin barq-o-sharar juz wahshat-e-zabt-e-tapidan-ha

bila gardan-e-be-parwa KHarami-ha-e-yar aatish

dhuen se aag ke ek abr-e-dariya-bar ho paida

'asad' haidar-paraston se agar howe do-chaar aatish