na mahfil aisi hoti hai na KHalwat aisi hoti hai

na mahfil aisī hotī hai na ḳhalvat aisī hotī hai

mire ma.abūd kyā jiine kī sūrat aisī hotī hai

bas ik kaifiyyat-e-ḳhud-raftagī tanhā.iyāñ apnī

hameñ miltī hai fursat bhī to fursat aisī hotī hai

ye duniyā sar-ba-sar rañgīniyoñ meñ Duub jaatī hai

tirī qāmat kī har shai meñ shabāhat aisī hotī hai

dar-o-dīvār par bas ek sannāTe kī raunaq hai

mire mehmāñ se pūchho ghar kī jannat aisī hotī hai

kahāñ apnī siyah-kārī kahāñ ye terī ma.asūmī

tujhe dekhā nahīñ jaatā nadāmat aisī hotī hai

koī dekhe tujhe to az-sar-e-nau zindagī māñge

rivāyat jhuuT hai qātil kī sūrat aisī hotī hai

ye majbūrī, mohabbat bhiik jaisī bhī gavārā hai

kabhī din raat ko terī zarūrat aisī hotī hai

bichhaḌ kar tujh se milne kī masarrat bhuul jaatā huuñ

ki mil kar phir bichhaḌne kī aziyyat aisī hotī hai

na mahfil aisi hoti hai na KHalwat aisi hoti hai

mere mabud kya jine ki surat aisi hoti hai

bas ek kaifiyyat-e-KHud-raftagi tanhaiyan apni

hamein milti hai fursat bhi to fursat aisi hoti hai

ye duniya sar-ba-sar ranginiyon mein Dub jati hai

teri qamat ki har shai mein shabahat aisi hoti hai

dar-o-diwar par bas ek sannaTe ki raunaq hai

mere mehman se puchho ghar ki jannat aisi hoti hai

kahan apni siyah-kari kahan ye teri masumi

tujhe dekha nahin jata nadamat aisi hoti hai

koi dekhe tujhe to az-sar-e-nau zindagi mange

riwayat jhuT hai qatil ki surat aisi hoti hai

ye majburi, mohabbat bhik jaisi bhi gawara hai

kabhi din raat ko teri zarurat aisi hoti hai

bichhaD kar tujh se milne ki masarrat bhul jata hun

ki mil kar phir bichhaDne ki aziyyat aisi hoti hai