na malal-e-hijr na muntazir hain hawa-e-sham-e-visal ke

na malāl-e-hijr na muntazir haiñ havā-e-shām-e-visāl ke

ham asiir apnī hī zaat ke kisī ḳhvāb ke na ḳhayāl ke

mire shauq-e-sair-o-safar ko ab na.e ik jahāñ kī numūd kar

tire bahr o bar ko to rakh diyā hai kabhī kā maiñ ne khañgāl ke

vo hamīñ the jin ke kamāl kī hai ye kā.enāt bhī mo'tarif

vahī ham ki aaj tamāsh-bīñ hue ḳhud hī apne zavāl ke

jo navāh-e-jāñ meñ muqīm haiñ unhīñ mausamoñ kā tilism hai

kabhī jaam uchhāle nashāt ke kabhī rañg uḌaa.e malāl ke

vahī sub.h o shaam ke marhale vahī ḳhaal o aab ke silsile

vahī qisse nān-o-namak ke haiñ vahī jhagḌe māl-o-manāl ke

tirā ā.īna huuñ maiñ zindagī tire aks kā maiñ amiin huuñ

hai mirī shikast tirā ziyāñ mujhe rakh bachā ke sambhāl ke

mire kār-zār-e-hayāt meñ na koī najīb na kam-nasab

yahāñ naam sirf hunar kā hai yahāñ charche bas haiñ kamāl ke

nahīñ gardishoñ meñ jo vaqt kī ho atā vo sā.at-e-māvarā

na to ibtidā ho na intihā na hoñ silsile mah o saal ke

na malal-e-hijr na muntazir hain hawa-e-sham-e-visal ke

hum asir apni hi zat ke kisi KHwab ke na KHayal ke

mere shauq-e-sair-o-safar ko ab nae ek jahan ki numud kar

tere bahr o bar ko to rakh diya hai kabhi ka main ne khangal ke

wo hamin the jin ke kamal ki hai ye kaenat bhi mo'tarif

wahi hum ki aaj tamash-bin hue KHud hi apne zawal ke

jo nawah-e-jaan mein muqim hain unhin mausamon ka tilism hai

kabhi jam uchhaale nashat ke kabhi rang uDae malal ke

wahi subh o sham ke marhale wahi KHal o aab ke silsile

wahi qisse nan-o-namak ke hain wahi jhagDe mal-o-manal ke

tera aaina hun main zindagi tere aks ka main amin hun

hai meri shikast tera ziyan mujhe rakh bacha ke sambhaal ke

mere kar-zar-e-hayat mein na koi najib na kam-nasab

yahan nam sirf hunar ka hai yahan charche bas hain kamal ke

nahin gardishon mein jo waqt ki ho ata wo saat-e-mawara

na to ibtida ho na intiha na hon silsile mah o sal ke