na murawwat hai na ulfat na wafa mere baad

na muravvat hai na ulfat na vafā mere ba.ad

merā sarmāya bhī duniyā se uThā mere ba.ad

bazm-e-mātam hī meñ aa jaao zarā mere ba.ad

chāhiye kuchh to tumheñ pās-e-vafā mere ba.ad

sham-e-madfan se ulajhtī hai sabā mere ba.ad

kaisī bigḌī hai zamāne kī havā mere ba.ad

charḳh kam-zarf hai sar-garm-e-jafā mere ba.ad

us ko marqad bhī khaTaktā hai mirā mere ba.ad

kaun letā thā ġham-e-arz-o-samā mere ba.ad

marne vaalā koī paidā na huā mere ba.ad

haa.e phir bhī na miTā un kī tabī.at kā ġhubār

kar chuke ḳhaak mirī vaqf-e-sabā mere ba.ad

husn kā dekhne vaalā koī baaqī na rahā

kis se karte ho tum ab sharm-o-hayā mere ba.ad

tum ne do phuul to madfan pe chaḌhā.e hote

tum se itnā bhī kabhī ho na sakā mere ba.ad

ho gayā qais ko bhī ishq kā da.avā paidā

ek afsāna nayā tum ne sunā mere ba.ad

ham ne dekhā nahīñ us zarf kā piine vaalā

shīsha kartā hai ye saaqī se gilā mere ba.ad

merī hastī se qayāmat ke uThe haiñ fitne

chhup ke parda meñ koī rah na sakā mere ba.ad

zulf khole hue rote haiñ vo pā.īn-e-mazār

jazb-e-ulfat ne baḌā kaam kiyā mere ba.ad

ḳhāk-e-turbat se mirī log shifā paate haiñ

maraz-e-ishq kī niklī hai davā mere ba.ad

ab vo ārām kahāñ ġhair ke vīrāne meñ

shab-e-furqat hai giraftār-e-balā mere ba.ad

barq ne rakkhā hai derīna ta.alluq qaa.em

āshiyāna meñ mire phuul paḌā mere ba.ad

TukḌe hotā hai jigar sun ke mohabbat kā bayāñ

koī suntā nahīñ bulbul kī sadā mere ba.ad

shaiḳh-e-makka ne paḌhā.ī hai janāze kī namāz

log samjhe mujhe kyā jāniye kyā mere ba.ad

kyuuñ baḌhe un kā qadam gor-e-ġharībāñ kī taraf

haath aayā hai unheñ uzr-e-hinā mere ba.ad

nau-giraftār-e-balā ek mirā dam niklā

dām-e-sayyād meñ koī na phañsā mere ba.ad

mujh se badnām hue shīsha-o-jām-o-sahbā

kyā kahegī mujhe maḳhlūq-e-ḳhudā mere ba.ad

fātiha kaun paḌhe qabr ko Thukrāte haiñ

un ko sūjhī hai qayāmat kī adā mere ba.ad

malak-ul-maut se uljheñge vo ye Dar hai mujhe

dekhiye kis pe chale teġh-e-adā mere ba.ad

be-hijābāna uThā dījiye chehre se naqāb

aur ab kaun hai mushtāq-laqā mere ba.ad

mere phūloñ se bhī dāman ko bachāyā us ne

log samjhe haiñ taġhāful ko hayā mere ba.ad

bul-havas ishq ke parde meñ numūdār hue

ab kahāñ sheva-e-taslīm-o-razā mere ba.ad

zab.h ke vaqt bhī qātil ko duā.eñ dī haiñ

qatre qatre se Tapaktī hai vafā mere ba.ad

zulf khole hue aa.e ho saf-e-mātam meñ

ḳhuub sūjhā amal-e-radd-e-balā mere ba.ad

jaan dete haiñ shahādat kī tamannā meñ ġharīb

lab-e-qātil pe ye jaarī hai sadā mere ba.ad

kākul-e-sāqī-e-kausar kā tasavvur ban kar

qabr par aa.ī hai rahmat kī ghaTā mere ba.ad

guftugū raat ye thī hashr bapā kab hogā

baḌh ke 'rāsiḳh' ne sar-e-bazm kahā mere ba.ad

na murawwat hai na ulfat na wafa mere baad

mera sarmaya bhi duniya se uTha mere baad

bazm-e-matam hi mein aa jao zara mere baad

chahiye kuchh to tumhein pas-e-wafa mere baad

sham-e-madfan se ulajhti hai saba mere baad

kaisi bigDi hai zamane ki hawa mere baad

charKH kam-zarf hai sar-garm-e-jafa mere baad

us ko marqad bhi khaTakta hai mera mere baad

kaun leta tha gham-e-arz-o-sama mere baad

marne wala koi paida na hua mere baad

hae phir bhi na miTa un ki tabiat ka ghubar

kar chuke KHak meri waqf-e-saba mere baad

husn ka dekhne wala koi baqi na raha

kis se karte ho tum ab sharm-o-haya mere baad

tum ne do phul to madfan pe chaDhae hote

tum se itna bhi kabhi ho na saka mere baad

ho gaya qais ko bhi ishq ka dawa paida

ek afsana naya tum ne suna mere baad

hum ne dekha nahin us zarf ka pine wala

shisha karta hai ye saqi se gila mere baad

meri hasti se qayamat ke uThe hain fitne

chhup ke parda mein koi rah na saka mere baad

zulf khole hue rote hain wo pain-e-mazar

jazb-e-ulfat ne baDa kaam kiya mere baad

KHak-e-turbat se meri log shifa pate hain

maraz-e-ishq ki nikli hai dawa mere baad

ab wo aaram kahan ghair ke virane mein

shab-e-furqat hai giraftar-e-bala mere baad

barq ne rakkha hai derina talluq qaem

aashiyana mein mere phul paDa mere baad

TukDe hota hai jigar sun ke mohabbat ka bayan

koi sunta nahin bulbul ki sada mere baad

shaiKH-e-makka ne paDhai hai janaze ki namaz

log samjhe mujhe kya jaaniye kya mere baad

kyun baDhe un ka qadam gor-e-ghariban ki taraf

hath aaya hai unhen uzr-e-hina mere baad

nau-giraftar-e-bala ek mera dam nikla

dam-e-sayyaad mein koi na phansa mere baad

mujh se badnam hue shisha-o-jam-o-sahba

kya kahegi mujhe maKHluq-e-KHuda mere baad

fatiha kaun paDhe qabr ko Thukraate hain

un ko sujhi hai qayamat ki ada mere baad

malak-ul-maut se uljhenge wo ye Dar hai mujhe

dekhiye kis pe chale tegh-e-ada mere baad

be-hijabana uTha dijiye chehre se naqab

aur ab kaun hai mushtaq-laqa mere baad

mere phulon se bhi daman ko bachaya us ne

log samjhe hain taghaful ko haya mere baad

bul-hawas ishq ke parde mein numudar hue

ab kahan shewa-e-taslim-o-raza mere baad

zabh ke waqt bhi qatil ko duaen di hain

qatre qatre se Tapakti hai wafa mere baad

zulf khole hue aae ho saf-e-matam mein

KHub sujha amal-e-radd-e-bala mere baad

jaan dete hain shahadat ki tamanna mein gharib

lab-e-qatil pe ye jari hai sada mere baad

kakul-e-saqi-e-kausar ka tasawwur ban kar

qabr par aai hai rahmat ki ghaTa mere baad

guftugu raat ye thi hashr bapa kab hoga

baDh ke 'rasiKH' ne sar-e-bazm kaha mere baad