na nawazishon ki hai aarzu na teri jafa ka malal hai

na navāzishoñ kī hai aarzū na tirī jafā kā malāl hai

tū nazar se apnī girā na de yahī ek dil meñ ḳhayāl hai

tujhe jān-e-mehr-o-vafā kaheñ tujhe aks-e-shān-e-ḳhudā kaheñ

tujhe kyā se kyā hai banā diyā ye mirī nazar kā kamāl hai

hai usī se ruuh meñ tāzgī yahī qalb-o-jāñ kī hai raushnī

tū ḳhudā-rā tark-e-sitam na kar mirī zindagī kā savāl hai

tirī raah meñ tirī chaah meñ ye maqām kaun sā aa gayā

ki ḳhushī kī mujh ko ḳhushī nahīñ na malāl hī kā malāl hai

vo nazar kisī kī jhukī jhukī vo hañsī kisī kī rukī rukī

kise pās-e-zabt kā hosh hai kise guftugū kī majāl hai

kabhī rote rote hañsā diyā kabhī hañste hañste rulā diyā

tirī yaad hī se hai har ḳhushī tire zikr hī se malāl hai

na nawazishon ki hai aarzu na teri jafa ka malal hai

tu nazar se apni gira na de yahi ek dil mein KHayal hai

tujhe jaan-e-mehr-o-wafa kahen tujhe aks-e-shan-e-KHuda kahen

tujhe kya se kya hai bana diya ye meri nazar ka kamal hai

hai usi se ruh mein tazgi yahi qalb-o-jaan ki hai raushni

tu KHuda-ra tark-e-sitam na kar meri zindagi ka sawal hai

teri rah mein teri chah mein ye maqam kaun sa aa gaya

ki KHushi ki mujh ko KHushi nahin na malal hi ka malal hai

wo nazar kisi ki jhuki jhuki wo hansi kisi ki ruki ruki

kise pas-e-zabt ka hosh hai kise guftugu ki majal hai

kabhi rote rote hansa diya kabhi hanste hanste rula diya

teri yaad hi se hai har KHushi tere zikr hi se malal hai