na nazar se koi guzar saka na hi dil se malba haTa saka

na nazar se koī guzar sakā na hī dil se malba haTā sakā

na vo dar bachā na vo ghar bachā tere ba.ad koī na aa sakā

na vo his kisī meñ na taab hai mirā ġham to ḳhair uThā.e kaun

vo jo misra ġham kā thā tarjumāñ koī us ko bhī na uThā sakā

kabhī ḳhauf thā tire hijr kā kabhī aarzū ke zavāl kā

rahā hijr-o-vasl ke darmiyāñ tujhe kho sakā na maiñ pā sakā

mire dil meñ tuḳhm-e-yaqīn rakh de lachak tū shāḳh-e-mizāj ko

vo chaman khilā mire bāġhbāñ jo chaman koī na khilā sakā

mire saath sū-e-junūn chal mire zaḳhm khā mirā raqs kar

mire sher paḌh ke milegā kyā patā paḌh ke ghar koī pā sakā?

jo likho ibārat-e-ishq tum to anā kā koī na pech ho

jo lab-e-davāt pe jhuk gayā vo qalam hī naqsh banā sakā

na nazar se koi guzar saka na hi dil se malba haTa saka

na wo dar bacha na wo ghar bacha tere baad koi na aa saka

na wo his kisi mein na tab hai mera gham to KHair uThae kaun

wo jo misra gham ka tha tarjuman koi us ko bhi na uTha saka

kabhi KHauf tha tere hijr ka kabhi aarzu ke zawal ka

raha hijr-o-wasl ke darmiyan tujhe kho saka na main pa saka

mere dil mein tuKHm-e-yaqin rakh de lachak tu shaKH-e-mizaj ko

wo chaman khila mere baghban jo chaman koi na khila saka

mere sath su-e-junun chal mere zaKHm kha mera raqs kar

mere sher paDh ke milega kya pata paDh ke ghar koi pa saka?

jo likho ibarat-e-ishq tum to ana ka koi na pech ho

jo lab-e-dawat pe jhuk gaya wo qalam hi naqsh bana saka