na phul hun na sitara hun aur na shoala hun

na phuul huuñ na sitāra huuñ aur na sho.ala huuñ

guhar huuñ dard kā aur ashk ban ke rahtā huuñ

vo ek bachcha hai hasrat se dekhtā hai mujhe

maiñ us ke haath meñ TuuTā huā khilaunā huuñ

ye soch kar ki bichhaḌnā hai ek din ḳhud se

maiñ apne-āp se pahroñ lipaT ke royā huuñ

ajiib shaḳhs mirī zindagī meñ aayā thā

na yaad rakhūñ use aur na bhuul saktā huuñ

laraz rahī haiñ mirī uñgliyāñ qalam thāme

na jaane aaj maiñ kyā baat likhne vaalā huuñ

mujhe pukār ki maiñ Duub hī na jā.ūñ kahīñ

maiñ be-qarār samundar meñ ik jazīra huuñ

guzar chuke haiñ bahut kārvāñ idhar se 'sarosh'

magar maiñ apne hī gard-e-safar se lipTā huuñ

na phul hun na sitara hun aur na shoala hun

guhar hun dard ka aur ashk ban ke rahta hun

wo ek bachcha hai hasrat se dekhta hai mujhe

main us ke hath mein TuTa hua khilauna hun

ye soch kar ki bichhaDna hai ek din KHud se

main apne-ap se pahron lipaT ke roya hun

ajib shaKHs meri zindagi mein aaya tha

na yaad rakhun use aur na bhul sakta hun

laraz rahi hain meri ungliyan qalam thame

na jaane aaj main kya baat likhne wala hun

mujhe pukar ki main Dub hi na jaun kahin

main be-qarar samundar mein ek jazira hun

guzar chuke hain bahut karwan idhar se 'sarosh'

magar main apne hi gard-e-safar se lipTa hun