na puchho ye mujhse ki kya dekhta hun

na pūchho ye mujh se ki kyā dekhtā huuñ

maiñ har shai meñ shān-e-ḳhudā dekhtā huuñ

haiñ duniyā meñ yuuñ to hazāroñ manāzir

maiñ manzar hī koī nayā dekhtā huuñ

garebāñ meñ muñh Daal kar jab bhī dekhā

ḳhatā maiñ to apnī sadā dekhtā huuñ

musībat koī hind par aa rahī hai

maiñ mashriq meñ kaalī ghaTā dekhtā huuñ

namak-pāshiyāñ un kī rahtī haiñ jaarī

maiñ zaḳhmoñ ko apne harā dekhtā huuñ

udhar barq ne āshiyāna jalāyā

idhar maiñ khaḌā dil jalā dekhtā huuñ

vo aa.e haiñ ghar meñ mire yā-ilāhī

maiñ ujḌā huā ghar basā dekhtā huuñ

nazar meñ mere hech hai saarī duniyā

tirā aasrā ai ḳhudā dekhtā huuñ

bhaveñ tan ga.e merī sunte hī bāteñ

hilāloñ ko laḌtā huā dekhtā huuñ

'karan' ho na ho aaj us gul se milnā

maiñ mar kar hī ik gul khilā dekhtā huuñ

na puchho ye mujh se ki kya dekhta hun

main har shai mein shan-e-KHuda dekhta hun

hain duniya mein yun to hazaron manazir

main manzar hi koi naya dekhta hun

gareban mein munh Dal kar jab bhi dekha

KHata main to apni sada dekhta hun

musibat koi hind par aa rahi hai

main mashriq mein kali ghaTa dekhta hun

namak-pashiyan un ki rahti hain jari

main zaKHmon ko apne hara dekhta hun

udhar barq ne aashiyana jalaya

idhar main khaDa dil jala dekhta hun

wo aae hain ghar mein mere ya-ilahi

main ujDa hua ghar basa dekhta hun

nazar mein mere hech hai sari duniya

tera aasra ai KHuda dekhta hun

bhawen tan gae meri sunte hi baaten

hilalon ko laDta hua dekhta hun

'karan' ho na ho aaj us gul se milna

main mar kar hi ek gul khila dekhta hun