na puchho zist-fasana tamam hone tak

na pūchho zīst-fasāna tamām hone tak

duāoñ tak thī sahar aur shaam rone tak

mujhe bhī ḳhud na thā ehsās apne hone kā

tirī nigāh meñ apnā maqām khone tak

har ek shaḳhs hai jab gosht nochne vaalā

bachegā kaun yahāñ nek-nām hone tak

chahār samt se rahzan kuchh is tarah TuuTe

ki jaise fasl kā thā ehtimām bone tak

batā rahā hai abhī tak tirā dhulā dāman

ki daaġh bhī haiñ numāyāñ tamām dhone tak

hazār rañg-e-tamannā hazār pachhtāve

ajab thā zehn meñ ik izhdihām sone tak

sunā hai ham ne bhī āzād thā kabhī 'āmir'

kisī kī chaah kā lekin ġhulām hone tak

na puchho zist-fasana tamam hone tak

duaon tak thi sahar aur sham rone tak

mujhe bhi KHud na tha ehsas apne hone ka

teri nigah mein apna maqam khone tak

har ek shaKHs hai jab gosht nochne wala

bachega kaun yahan nek-nam hone tak

chahaar samt se rahzan kuchh is tarah TuTe

ki jaise fasl ka tha ehtimam bone tak

bata raha hai abhi tak tera dhula daman

ki dagh bhi hain numayan tamam dhone tak

hazar rang-e-tamanna hazar pachhtawe

ajab tha zehn mein ek izhdiham sone tak

suna hai hum ne bhi aazad tha kabhi 'amir'

kisi ki chah ka lekin ghulam hone tak