نہ قریب و دور کی بات کر نہ فریب راہگزر میں آ

نہ قریب و دور کی بات کر نہ فریب راہگزر میں آ

تو نگار صبح سے بچ کے چل نہ طلسم شب کے اثر میں آ

یہ نیاز و ناز کے سلسلے یہ امید و بیم کے مرحلے

نہ کسی نظر سے کلام کر نہ فساد حسن نظر میں آ

میں تری تلاش میں بارہا سر لامکاں سے گزر گیا

تجھے لا مکاں کی ہے جستجو مرے جسم و جاں کے کھنڈر میں آ

میں ہوں شہر خواب کا کوزہ گر مجھے اپنے جسم کی خاک دے

تجھے چاک جاں پہ نکھار دوں کبھی میرے دست ہنر میں آ

تو ہے حسن و عشق کا نغمہ گر تو جہان نو کا پیامبر

تجھے یاد کرتے ہیں بام و در ارے بے خبر مرے گھر میں آ

مرا نجد شوق ہے جاں بلب یہ فرات جسم ہے تشنہ لب

کسی نقش پا کو خبر نہ ہو تو حدود گرد سفر میں آ

تو ہے اک شبیہ حرم نما میں شکست شیشہ کی ہوں صدا

حد ماسوا سے گزر کے تو کبھی میری حد نظر میں آ

یہ گلوئے خشک یہ ریگزار یہ سرخ بوند سی تتلیاں

میں کنار آب ہوں خیمہ زن مری خواہشوں کے نگر میں آ

کسی دشت برف مثال میں مری آرزو بھی ہے منجمد

مرے ماہ و سال پہ کر نظر تو حصار رقص شرر میں آ

ابھی ابر برق فروش بھی مرے خار و خس سے ہے بے خبر

یہ مظفرؔ اپنی ہے ان کہی کہ تو درد بن کے جگر میں آ