na qasida na ghazal aur na rubai likhiye

na qasīda na ġhazal aur na rubā.ī likhiye

daur-e-maujūda meñ kuchh dil kī tabāhī likhiye

zaḳhm-ḳhurda ġham-e-daurāñ se haiñ jazbāt-e-latīf

husn aur ishq kī kyā mad.h-sarā.ī likhiye

bujh ga.e dil meñ ummīdoñ ke charāġh-e-raushan

yās-o-hirmāñ ke añdheroñ kī siyāhī likhiye

ab to duniyā meñ haiñ yūsuf ke barādar lākhoñ

dushman-e-jāñ kise likhiye kise bhaa.ī likhiye

taḳht-e-fir.aun pe baiThe haiñ jo insāñ-dushman

ham se kahte haiñ unheñ zill-e-ilāhī likhiye

kis adālat meñ kareñ pesh muqadma dil kā

ab kaheñ kis se ki ashkoñ kī gavāhī likhiye

na qasida na ghazal aur na rubai likhiye

daur-e-maujuda mein kuchh dil ki tabahi likhiye

zaKHm-KHurda gham-e-dauran se hain jazbaat-e-latif

husn aur ishq ki kya madh-sarai likhiye

bujh gae dil mein ummidon ke charagh-e-raushan

yas-o-hirman ke andheron ki siyahi likhiye

ab to duniya mein hain yusuf ke baradar lakhon

dushman-e-jaan kise likhiye kise bhai likhiye

taKHt-e-firaun pe baiThe hain jo insan-dushman

hum se kahte hain unhen zill-e-ilahi likhiye

kis adalat mein karen pesh muqadma dil ka

ab kahen kis se ki ashkon ki gawahi likhiye