na ras aai chaman-zar ki faza mujhko

na raas aa.ī chaman-zār kī fazā mujh ko

mizāj-e-barq ne be-ghar banā diyā mujh ko

tamām umr bhaTakte rahe jo rāhoñ meñ

dikhā rahe haiñ vahī aaj rāstā mujh ko

hujūm-e-dard meñ dil ne to sab kā saath diyā

milā na apne hī ashkoñ kā ham-navā mujh ko

vo paas the to har ik shai meñ dil dhaḌaktā thā

vo duur haiñ to khaTaktī hai har fazā mujh ko

ye kārvāñ na mirī gumrahī pe yuuñ hañstā

rah-e-talab meñ jo milte vo naqsh-e-pā mujh ko

qadam qadam pe sañvārā jinheñ mohabbat meñ

samajh rahe haiñ vahī ab shikasta-pā mujh ko

koī rafīq na rahbar na koī rāhguzar

uḌā ke laa.ī hai kis shahr meñ havā mujh ko

'hayāt' dukhtī huī rag ko kis ne chheḌ diyā

uThī vo Tiis ki yaad aa gayā ḳhudā mujh ko

na ras aai chaman-zar ki faza mujh ko

mizaj-e-barq ne be-ghar bana diya mujh ko

tamam umr bhaTakte rahe jo rahon mein

dikha rahe hain wahi aaj rasta mujh ko

hujum-e-dard mein dil ne to sab ka sath diya

mila na apne hi ashkon ka ham-nawa mujh ko

wo pas the to har ek shai mein dil dhaDakta tha

wo dur hain to khaTakti hai har faza mujh ko

ye karwan na meri gumrahi pe yun hansta

rah-e-talab mein jo milte wo naqsh-e-pa mujh ko

qadam qadam pe sanwara jinhen mohabbat mein

samajh rahe hain wahi ab shikasta-pa mujh ko

koi rafiq na rahbar na koi rahguzar

uDa ke lai hai kis shahr mein hawa mujh ko

'hayat' dukhti hui rag ko kis ne chheD diya

uThi wo Tis ki yaad aa gaya KHuda mujh ko