na ras aaya tasawwur mein qurbaten rakhna

na raas aaya tasavvur meñ qurbateñ rakhnā

kisī ke naam se be-vaj.h nisbateñ rakhnā

jahāñ bhī aap pe ilzām aane vaalā ho

mirī qasam hai vahāñ mujh pe tohmateñ rakhnā

rivāyatoñ se baġhāvat ke baad mushkil hai

guzishta daur kī qaa.em rivāyateñ rakhnā

mujh aise ḳhvāb meñ jin kī nahīñ koī ta.abīr

tum aise ḳhvāboñ kī dil meñ na hasrateñ rakhnā

vo be-naqāb huā hai na hone vaalā hai

abas hai diid kī āñkhoñ meñ hasrateñ rakhnā

ḳhulūs-e-dil se milo har kisī se ai 'rāhī'

tumhārā kaam nahīñ hai riqābateñ rakhnā

na ras aaya tasawwur mein qurbaten rakhna

kisi ke nam se be-wajh nisbaten rakhna

jahan bhi aap pe ilzam aane wala ho

meri qasam hai wahan mujh pe tohmaten rakhna

riwayaton se baghawat ke baad mushkil hai

guzishta daur ki qaem riwayaten rakhna

mujh aise KHwab mein jin ki nahin koi tabir

tum aise KHwabon ki dil mein na hasraten rakhna

wo be-naqab hua hai na hone wala hai

abas hai did ki aankhon mein hasraten rakhna

KHulus-e-dil se milo har kisi se ai 'rahi'

tumhaara kaam nahin hai riqabaten rakhna