na raaz-e-ibtida samjho na raaz-e-intiha samjho

na rāz-e-ibtidā samjho na rāz-e-intihā samjho

nazar vāloñ tumheñ karnā hai ab duniyā meñ kyā samjho

talab meñ sidq hai to ek din manzil pe pahuñchoge

qadam aage baḌhāo ḳhud ko apnā rahnumā samjho

ye kyā andāz hai itnā gurez ahl-e-tamannā se

ḳhudā taufīq de to ahl-e-dil kā mudda.ā samjho

tumhāre har ishāre par sar-e-taslīm ḳham lekin

guzārish hai ki jazbāt-e-mohabbat ko zarā samjho

ho koī mauj-e-tūfāñ yā havā-e-tund kā jhoñkā

jo pahuñchā de lab-e-sāhil usī ko nāḳhudā samjho

jise dekho vahī badmast hī maġhrūr hai hamdam

koī banda nahīñ duniyā meñ kis kis ko ḳhudā samjho

yahāñ rahbar ke parde meñ bahut rahzan haiñ ai 'aḳhtar'

raho duur us se tum jis ko vafā nā-āshnā samjho

na raaz-e-ibtida samjho na raaz-e-intiha samjho

nazar walon tumhein karna hai ab duniya mein kya samjho

talab mein sidq hai to ek din manzil pe pahunchoge

qadam aage baDhao KHud ko apna rahnuma samjho

ye kya andaz hai itna gurez ahl-e-tamanna se

KHuda taufiq de to ahl-e-dil ka muddaa samjho

tumhaare har ishaare par sar-e-taslim KHam lekin

guzarish hai ki jazbaat-e-mohabbat ko zara samjho

ho koi mauj-e-tufan ya hawa-e-tund ka jhonka

jo pahuncha de lab-e-sahil usi ko naKHuda samjho

jise dekho wahi badmast hi maghrur hai hamdam

koi banda nahin duniya mein kis kis ko KHuda samjho

yahan rahbar ke parde mein bahut rahzan hain ai 'aKHtar'

raho dur us se tum jis ko wafa na-ashna samjho