na rahnuma na kisi rahzan ki fikr karo

na rahnumā na kisī rāhzan kī fikr karo

girī hai barq jahāñ us chaman kī fikr karo

tumhīñ se husn-e-gulistāñ tumhīñ se rang-e-bahār

sajī sajā.ī huī anjuman kī fikr karo

kamand chāñd sitāroñ pe Dālne vaalo

darāz-dastī-e-charḳh-e-kuhan kī fikr karo

tum apnī kākul-e-ambar-fishāñ na bikhrāo

ḳhirad ke shāna-e-mashshāta-fan kī fikr karo

adā-e-husn kī ma.asūmiyat pe shak na karo

nigāh-e-sāqī-e-paimāñ-shikan kī fikr karo

zamīn-e-sher-o-suḳhan sho.ala-bār hai 'tasnīm'

tum is zamīñ meñ na sher-o-suḳhan kī fikr karo

na rahnuma na kisi rahzan ki fikr karo

giri hai barq jahan us chaman ki fikr karo

tumhin se husn-e-gulistan tumhin se rang-e-bahaar

saji sajai hui anjuman ki fikr karo

kamand chand sitaron pe Dalne walo

daraaz-dasti-e-charKH-e-kuhan ki fikr karo

tum apni kakul-e-ambar-fishan na bikhrao

KHirad ke shana-e-mashshata-fan ki fikr karo

ada-e-husn ki masumiyat pe shak na karo

nigah-e-saqi-e-paiman-shikan ki fikr karo

zamin-e-sher-o-suKHan shoala-bar hai 'tasnim'

tum is zamin mein na sher-o-suKHan ki fikr karo