na sani jab mazaq-e-husn ko apna nazar aaya

na saanī jab mazāq-e-husn ko apnā nazar aayā

nigāh-e-shauq tak le kar payām-e-fitna-gar aayā

kahā lā-raib baḌh kar ilm-o-dānish ne aqīdat se

jo bazm-e-ahl-e-fan meñ aaj mujh sā be-hunar aayā

sar-e-mahfil churānā mujh se dāman is kā zāmin hai

nahīñ aayā agar mujh tak ba-andāz-e-digar aayā

bahut ai dil tirī rūdād-e-ġham ne tuul khīñchā hai

kabhī vo but bhī sunñe ko ye qissa muḳhtasar aayā

hamārī ik ḳhatā ne ḳhuld se duniyā meñ lā pheñkā

agar dar-pesh duniyā se bhī phir koī safar aayā

maiñ ḳhud hī bevafā huuñ be-adab huuñ apnā qātil huuñ

har ik ilzām mere sar ba-alfāz-e-digar aayā

mukaddar kuchh fazā 'gulzār' dillī meñ sahī lekin

kahīñ ahl-e-zabāñ ham sā bhī urdu meñ nazar aayā

na sani jab mazaq-e-husn ko apna nazar aaya

nigah-e-shauq tak le kar payam-e-fitna-gar aaya

kaha la-raib baDh kar ilm-o-danish ne aqidat se

jo bazm-e-ahl-e-fan mein aaj mujh sa be-hunar aaya

sar-e-mahfil churana mujh se daman is ka zamin hai

nahin aaya agar mujh tak ba-andaz-e-digar aaya

bahut ai dil teri rudad-e-gham ne tul khincha hai

kabhi wo but bhi sunne ko ye qissa muKHtasar aaya

hamari ek KHata ne KHuld se duniya mein la phenka

agar dar-pesh duniya se bhi phir koi safar aaya

main KHud hi bewafa hun be-adab hun apna qatil hun

har ek ilzam mere sar ba-alfaz-e-digar aaya

mukaddar kuchh faza 'gulzar' dilli mein sahi lekin

kahin ahl-e-zaban hum sa bhi urdu mein nazar aaya