na sahi kuchh magar itna to kiya karte the

na sahī kuchh magar itnā to kiyā karte the

vo mujhe dekh ke pahchān liyā karte the

āḳhir-e-kār hue terī razā ke pāband

ham ki har baat pe isrār kiyā karte the

ḳhaak haiñ ab tirī galiyoñ kī vo izzat vaale

jo tire shahr kā paanī na piyā karte the

ab to insān kī azmat bhī koī chiiz nahīñ

log patthar ko ḳhudā maan liyā karte the

dosto ab mujhe gardan-zadanī kahte ho

tum vahī ho ki mire zaḳhm siyā karte the

ham jo dastak kabhī dete the sabā kī mānind

aap darvāza-e-dil khol diyā karte the

ab to 'shahzād' sitāroñ pe lagī haiñ nazreñ

kabhī ham log bhī miTTī meñ jiyā karte the

na sahi kuchh magar itna to kiya karte the

wo mujhe dekh ke pahchan liya karte the

aaKHir-e-kar hue teri raza ke paband

hum ki har baat pe israr kiya karte the

KHak hain ab teri galiyon ki wo izzat wale

jo tere shahr ka pani na piya karte the

ab to insan ki azmat bhi koi chiz nahin

log patthar ko KHuda man liya karte the

dosto ab mujhe gardan-zadani kahte ho

tum wahi ho ki mere zaKHm siya karte the

hum jo dastak kabhi dete the saba ki manind

aap darwaza-e-dil khol diya karte the

ab to 'shahzad' sitaron pe lagi hain nazren

kabhi hum log bhi miTTi mein jiya karte the