na sang-e-rah na sadd-e-quyud ki surat

na sañg-e-rāh na sadd-e-quyūd kī sūrat

maiñ Dah rahā huuñ ab apne vajūd kī sūrat

jagah pe apnī jamā hai vo sañg kī mānind

bikhar rahā huuñ maiñ dīvār-e-dūd kī sūrat

jabīñ pe ḳhāk-e-taqaddus huuñ mujh ko pahchāno

chamak rahā huuñ maiñ naqsh-e-sujūd kī sūrat

mirī nazar meñ tayaqqun kī dhuup raushan ho

kabhī to phaile vo rañg-e-shuhūd kī sūrat

guzashta sadiyoñ kā bhī bojh mujh ko Dhonā thā

adā huā huuñ maiñ har lamha suud kī sūrat

laraz rahā huuñ maiñ apnī jasāratoñ par 'shām'

vo sahmā sahmā khaḌā hai jumūd kī sūrat

na sang-e-rah na sadd-e-quyud ki surat

main Dah raha hun ab apne wajud ki surat

jagah pe apni jama hai wo sang ki manind

bikhar raha hun main diwar-e-dud ki surat

jabin pe KHak-e-taqaddus hun mujh ko pahchano

chamak raha hun main naqsh-e-sujud ki surat

meri nazar mein tayaqqun ki dhup raushan ho

kabhi to phaile wo rang-e-shuhud ki surat

guzashta sadiyon ka bhi bojh mujh ko Dhona tha

ada hua hun main har lamha sud ki surat

laraz raha hun main apni jasaraton par 'sham'

wo sahma sahma khaDa hai jumud ki surat