na Thahra dil mera gham khane wala

na Thahrā dil mirā ġham khāne vaalā

gayā duniyā se āḳhir jaane vaalā

nasīb-e-ġhair hī terī baqā hai

are o bevafā tarsāne vaalā

dil-e-dushman shagufta vasl kī shab

mirā dil dāġh-e-furqat khāne vaalā

musībat merī kyā raushan ho us par

ḳhabar bhī ho koī le jaane vaalā

shagufta ho jo dil vasl-e-butāñ meñ

shab-e-furqat vo hai murjhāne vaalā

bajā hai zikr hai vaa.iz ke lab par

mirā vo dost hai maiḳhāne vaalā

yahī dil hai jo shaidā-e-mizha hai

nishāne par tire chaḌh jaane vaalā

ruḳh-o-gesū haiñ donoñ husn-ārā

ye ahl-e-ā.ina vo shāne vaalā

ḳhayāl-e-mū-e-mizhgāñ chain kyā de

yahī nashtar to hai taḌpāne vaalā

maiñ naqsh-e-pā huuñ miT kar bhī rahūñgā

tire dar se nahīñ uTh jaane vaalā

ḳhayāl-e-ġhair aur furqat kā aalam

farishta maut kā hai aane vaalā

mirā hī sar faqat hai vaqf-e-saugand

are o jhūTī qasmeñ khāne vaalā

'tabīb'-e-ḳhasta-jāñ huuñ maiñ hī ai jaañ

tumhāre naam par mar jaane vaalā

na Thahra dil mera gham khane wala

gaya duniya se aaKHir jaane wala

nasib-e-ghair hi teri baqa hai

are o bewafa tarsane wala

dil-e-dushman shagufta wasl ki shab

mera dil dagh-e-furqat khane wala

musibat meri kya raushan ho us par

KHabar bhi ho koi le jaane wala

shagufta ho jo dil wasl-e-butan mein

shab-e-furqat wo hai murjhane wala

baja hai zikr hai waiz ke lab par

mera wo dost hai maiKHane wala

yahi dil hai jo shaida-e-mizha hai

nishane par tere chaDh jaane wala

ruKH-o-gesu hain donon husn-ara

ye ahl-e-aina wo shane wala

KHayal-e-mu-e-mizhgan chain kya de

yahi nashtar to hai taDpane wala

main naqsh-e-pa hun miT kar bhi rahunga

tere dar se nahin uTh jaane wala

KHayal-e-ghair aur furqat ka aalam

farishta maut ka hai aane wala

mera hi sar faqat hai waqf-e-saugand

are o jhuTi qasmen khane wala

'tabib'-e-KHasta-jaan hun main hi ai jaan

tumhaare nam par mar jaane wala