na to aaghaz na anjam pe rona aaya

na to āġhāz na anjām pe ronā aayā

apnī diqqat kī har ik shaam pe ronā aayā

ahl-e-mahfil ko huī sham.a ke jalne kī ḳhushī

mujh ko parvāne ke anjām pe ronā aayā

dil se ubhrā to nigāhoñ ke darīche se girā

ashk bante hue har jaam pe ronā aayā

vaqt-e-ruḳhsat jo nigāhoñ ne tirī mujh ko diyā

yās-o-ummīd ke paiġhām pe ronā aayā

ham ġharīboñ kī bhalā sub.h kahāñ shaam kahāñ

sub.h par ashk bahe shaam pe ronā aayā

merī taqdīr meñ dar dar kā bhaTaknā thā 'kañval'

husn-e-āġhāz ke anjām pe ronā aayā

na to aaghaz na anjam pe rona aaya

apni diqqat ki har ek sham pe rona aaya

ahl-e-mahfil ko hui shama ke jalne ki KHushi

mujh ko parwane ke anjam pe rona aaya

dil se ubhra to nigahon ke dariche se gira

ashk bante hue har jam pe rona aaya

waqt-e-ruKHsat jo nigahon ne teri mujh ko diya

yas-o-ummid ke paigham pe rona aaya

hum gharibon ki bhala subh kahan sham kahan

subh par ashk bahe sham pe rona aaya

meri taqdir mein dar dar ka bhaTakna tha 'kanwal'

husn-e-aghaz ke anjam pe rona aaya