na to tare bujhen pal bhar na din mein chand chhupta hai

na to taare bujheñ pal bhar na din meñ chāñd chhuptā hai

ajab duniyā hai dil kī raat bhar sūraj bhī chamkā hai

zamīñ ashkoñ se dil kī bhīgtī hai tab kahīñ jā kar

laboñ pe muskurāhaT kā basantī phuul khiltā hai

liye ye fursatoñ kī reshmī chhatrī mujhe milne

jhijaktī būñdā-bāndī sā chhatoñ pe kaun aayā hai

badan kī vādiyoñ meñ gum kahīñ ho jaatī hai dhaḌkan

kabhī parvat se dil ke yaad kā jab jharnā girtā hai

khilaunoñ kī dukānoñ pe qadam ruk jaate haiñ ab bhī

mire dil ke kisī kone meñ bachpan chhup ke baiThā hai

agar ḳhushbū mulāqātoñ kī sāñsoñ meñ nahīñ to kyā

mere dil meñ kisī kī yaad kā chandan mahaktā hai

december kī ThiThurī raat meñ us peḌ ke nīche

lapeTe yaad kā kambal akelā kaun baiThā hai

purāne mausamoñ kī gard bah jaatī hai paanī meñ

kabhī jab tez jharnoñ meñ parinda pankh dhotā hai

na to tare bujhen pal bhar na din mein chand chhupta hai

ajab duniya hai dil ki raat bhar suraj bhi chamka hai

zamin ashkon se dil ki bhigti hai tab kahin ja kar

labon pe muskurahaT ka basanti phul khilta hai

liye ye fursaton ki reshmi chhatri mujhe milne

jhijakti bunda-bandi sa chhaton pe kaun aaya hai

badan ki wadiyon mein gum kahin ho jati hai dhaDkan

kabhi parwat se dil ke yaad ka jab jharna girta hai

khilaunon ki dukanon pe qadam ruk jate hain ab bhi

mere dil ke kisi kone mein bachpan chhup ke baiTha hai

agar KHushbu mulaqaton ki sanson mein nahin to kya

mere dil mein kisi ki yaad ka chandan mahakta hai

december ki ThiThuri raat mein us peD ke niche

lapeTe yaad ka kambal akela kaun baiTha hai

purane mausamon ki gard bah jati hai pani mein

kabhi jab tez jharnon mein parinda pankh dhota hai