na tum mile the to duniya charagh-pa bhi na thi

na tum mile the to duniyā charāġh-pā bhī na thī

ye mehrbāñ to nahīñ thī magar ḳhafā bhī na thī

ajab ġharībī ke aalam meñ mar gayā ik shaḳhs

ki sar pe taaj thā dāman meñ ik duā bhī na thī

na itnā bikhrī thī pahle kitāb-e-hastī bhī

aur itnī tez mire shahr kī havā bhī na thī

ḳhushī to ye hai ki pās-e-adab rakhā ham ne

malāl ye hai ki apnī koī ḳhatā bhī na thī

mirī hayāt kahāñ tak tirī safā.ī duuñ

ki tū ḳharāb nahīñ thī to pārsā bhī na thī

bhalā kiyā ki hameñ zahr de diyā tum ne

alāva is ke hamārī koī davā bhī na thī

badal rahā hai musalsal mizāj duniyā kā

ye bevafā thī magar aisī be-hayā bhī na thī

na tum mile the to duniya charagh-pa bhi na thi

ye mehrban to nahin thi magar KHafa bhi na thi

ajab gharibi ke aalam mein mar gaya ek shaKHs

ki sar pe taj tha daman mein ek dua bhi na thi

na itna bikhri thi pahle kitab-e-hasti bhi

aur itni tez mere shahr ki hawa bhi na thi

KHushi to ye hai ki pas-e-adab rakha hum ne

malal ye hai ki apni koi KHata bhi na thi

meri hayat kahan tak teri safai dun

ki tu KHarab nahin thi to parsa bhi na thi

bhala kiya ki hamein zahr de diya tum ne

alawa is ke hamari koi dawa bhi na thi

badal raha hai musalsal mizaj duniya ka

ye bewafa thi magar aisi be-haya bhi na thi