na wo iqrar karta hai na wo inkar karta hai

na vo iqrār kartā hai na vo inkār kartā hai

hameñ phir bhī gumāñ hai vo hamīñ se pyaar kartā hai

maiñ us ke kis sitam kī surḳhiyāñ aḳhbār meñ dekhūñ

vo zālim hai magar har zulm se inkār kartā hai

muñDeroñ se koī mānūs sī āvāz aatī hai

koī to yaad ham ko bhī pas-e-dīvār kartā hai

ye us ke pyaar kī bāteñ faqat qisse purāne haiñ

bhalā kachche ghaḌe par kaun dariyā paar kartā hai

hameñ ye dukh ki vo aksar ka.ī mausam nahīñ miltā

magar milne kā vā'da ham se vo har baar kartā hai

'hasan' rātoñ ko jab sab log mīThī niind sote haiñ

to ik ḳhvāb-āshnā chehra hameñ bedār kartā hai

na wo iqrar karta hai na wo inkar karta hai

hamein phir bhi guman hai wo hamin se pyar karta hai

main us ke kis sitam ki surKHiyan aKHbar mein dekhun

wo zalim hai magar har zulm se inkar karta hai

munDeron se koi manus si aawaz aati hai

koi to yaad hum ko bhi pas-e-diwar karta hai

ye us ke pyar ki baaten faqat qisse purane hain

bhala kachche ghaDe par kaun dariya par karta hai

hamein ye dukh ki wo aksar kai mausam nahin milta

magar milne ka wa'da hum se wo har bar karta hai

'hasan' raaton ko jab sab log miThi nind sote hain

to ek KHwab-ashna chehra hamein bedar karta hai