na wo wada-e-sar-e-rah hai na wo dosti na nibah hai

na vo va.ada-e-sar-e-rāh hai na vo dostī na nibāh hai

na vo dil-farebī ke haiñ chalan na vo pyārī pyārī nigāh hai

tire hijr meñ mah-e-sīm-bar koī ġhaur se jo kare nazar

mirī sub.h shaam se hai batar mirā roz shab se siyāh hai

hai har ek baat meñ ab kajī ki chalan nikāle haiñ aur hī

na vo rabt hai na vo dostī na vo rasm hai na vo raah hai

koī zahr-e-ġham piye tā-ba-kai huī sarf-e-sāġhar-e-ġhair mai

na vo joshish-e-sar-e-shām hai na vo va.ada-e-shab-e-māh hai

bane kyūñke phir mirī us kī ab ki ye tafraqa hai baḌā ġhazab

mujhe us se achchhe kī hai talab use mujh se achchhe kī chaah hai

kabhī sāmne se jo vo jaa.e hai kabhī pher muñh ko dikhā.e hai

mujhe dard-e-rashk satā.e hai ki yahī vo ġhairat-e-māh hai

thī nigāh pahle to us kī vuuñ kahīñ dostī meñ huā hai yuuñ

diyā us ne dil kahīñ aur kyuuñ yahī 'mus.hafī' kā gunāh hai

na wo wada-e-sar-e-rah hai na wo dosti na nibah hai

na wo dil-farebi ke hain chalan na wo pyari pyari nigah hai

tere hijr mein mah-e-sim-bar koi ghaur se jo kare nazar

meri subh sham se hai batar mera roz shab se siyah hai

hai har ek baat mein ab kaji ki chalan nikale hain aur hi

na wo rabt hai na wo dosti na wo rasm hai na wo rah hai

koi zahr-e-gham piye ta-ba-kai hui sarf-e-saghar-e-ghair mai

na wo joshish-e-sar-e-sham hai na wo wada-e-shab-e-mah hai

bane kyunke phir meri us ki ab ki ye tafraqa hai baDa ghazab

mujhe us se achchhe ki hai talab use mujh se achchhe ki chah hai

kabhi samne se jo wo jae hai kabhi pher munh ko dikhae hai

mujhe dard-e-rashk satae hai ki yahi wo ghairat-e-mah hai

thi nigah pahle to us ki wun kahin dosti mein hua hai yun

diya us ne dil kahin aur kyun yahi 'mushafi' ka gunah hai