na zikr-e-ashna ne qissa-e-begana rakhte hain

na zikr-e-āshnā ne qissa-e-begāna rakhte haiñ

hadīs-e-yār rakhte haiñ yahī afsāna rakhte haiñ

chaman meñ sarv-qad gar jalva-e-mastāna rakhte haiñ

ba-rañg-e-tauq-e-qumrī ham ḳhat-e-paimāna rakhte haiñ

ḳhayāl āñkhoñ kā terī jabki ai jānāna rakhte haiñ

to juuñ nargis har ik añgusht bar paimāna rakhte haiñ

numāyāñ zulf ke halqe meñ kar Tuk ḳhāl-e-āriz ko

ki haiñ sayyād jitne daam meñ vo daana rakhte haiñ

ba-juz-ā.īna māshūqoñ kī kab ho zulf-pardāzī

ki aks-e-panja-e-mizhgāñ se dast-e-shāna rakhte haiñ

bajā.e halqa-e-kākul haiñ ḳhāl-e-rū-e-said-afgan

ba-chashm-e-dām jā-e-mardumuk yaañ daana rakhte haiñ

bisān-e-chob-o-naqqārā haiñ ḳhaar o ābla-pā.ī

ba-vādī-e-junūñ-añgez naubat-ḳhāna rakhte haiñ

nahīñ ashk-e-musalsal ye garebāñ-gīr ai saaqī

gale meñ apne āshiq sub.ha-e-sad-dāna rakhte haiñ

sadā-e-āshnā.ī misl-e-hamdam ho so vo jaane

ki misl-e-bāñsurī añgusht-bar har ḳhāna rakhte haiñ

na uljho is qadar be-vaj.h suljhāne meñ zulfoñ ke

dil-e-sad-chāk to ham bhī ba-rañg-e-shāna rakhte haiñ

dil apnā kyuuñ na ho bahr-e-jahāñ meñ juuñ guhar kaalā

talāsh-e-āb hai ham ko na fikr-e-dāna rakhte haiñ

na kyūñkar bazm meñ raushan ho apnī shab ye dil-sozī

ki ulfat sham.a-rū se ham bhī juuñ parvāna rakhte haiñ

bahār aa.ī hai ab to ai junūñ ho silsila jumbāñ

ki ham muddat se qasd-e-raftan-e-vīrāna rakhte haiñ

nigah Tuk abrū-o-chashm-e-butāñ par kījiyo zāhid

ki ye mehrāb-e-masjid ke tale mai-ḳhāna rakhte haiñ

biThā.eñ sarv-o-shamshād apne sar par kyuuñ na qumrī ko

tire qad ke haiñ bande vaz-e-āzādāna rakhte haiñ

Thikānā kuchh na pūchho ham se tum ḳhāna-ba-doshoñ kā

jahāñ juuñ bū-e-gul Thahre vahīñ kāshāna rakhte haiñ

hameñ mat chheḌ kar dekho rulāo aur jalāo tum

ki tūfāñ chashm meñ siine meñ ātiash-ḳhāna rakhte haiñ

kareñge bai.at-e-dast-e-subū pīr-e-muġhāñ tujh se

ki shauq-e-sharb-e-mai hai mashrab-e-rindāna rakhte haiñ

'nasīr' ab ham ko kyā hai qissa-e-kaunain se matlab

ki chashm-e-pur-fusūn-e-yār kā afsāna rakhte haiñ

'nasīr' us shoḳh se kahnā ki pesh-e-chashm-e-hairat meñ

tasavvur roz-o-shab terā ham ai jānāna rakhte haiñ

na zikr-e-ashna ne qissa-e-begana rakhte hain

hadis-e-yar rakhte hain yahi afsana rakhte hain

chaman mein sarw-qad gar jalwa-e-mastana rakhte hain

ba-rang-e-tauq-e-qumri hum KHat-e-paimana rakhte hain

KHayal aankhon ka teri jabki ai jaanana rakhte hain

to jun nargis har ek angusht bar paimana rakhte hain

numayan zulf ke halqe mein kar Tuk KHal-e-ariz ko

ki hain sayyaad jitne dam mein wo dana rakhte hain

ba-juz-aina mashuqon ki kab ho zulf-pardazi

ki aks-e-panja-e-mizhgan se dast-e-shana rakhte hain

bajae halqa-e-kakul hain KHal-e-ru-e-said-afgan

ba-chashm-e-dam ja-e-mardumuk yan dana rakhte hain

bisan-e-chob-o-naqqara hain KHar o aabla-pai

ba-wadi-e-junun-angez naubat-KHana rakhte hain

nahin ashk-e-musalsal ye gareban-gir ai saqi

gale mein apne aashiq subha-e-sad-dana rakhte hain

sada-e-ashnai misl-e-hamdam ho so wo jaane

ki misl-e-bansuri angusht-bar har KHana rakhte hain

na uljho is qadar be-wajh suljhane mein zulfon ke

dil-e-sad-chaak to hum bhi ba-rang-e-shana rakhte hain

dil apna kyun na ho bahr-e-jahan mein jun guhar kala

talash-e-ab hai hum ko na fikr-e-dana rakhte hain

na kyunkar bazm mein raushan ho apni shab ye dil-sozi

ki ulfat shama-ru se hum bhi jun parwana rakhte hain

bahaar aai hai ab to ai junun ho silsila jumban

ki hum muddat se qasd-e-raftan-e-virana rakhte hain

nigah Tuk abru-o-chashm-e-butan par kijiyo zahid

ki ye mehrab-e-masjid ke tale mai-KHana rakhte hain

biThaen sarw-o-shamshad apne sar par kyun na qumri ko

tere qad ke hain bande waz-e-azadana rakhte hain

Thikana kuchh na puchho hum se tum KHana-ba-doshon ka

jahan jun bu-e-gul Thahre wahin kashana rakhte hain

hamein mat chheD kar dekho rulao aur jalao tum

ki tufan chashm mein sine mein aatiash-KHana rakhte hain

karenge baiat-e-dast-e-subu pir-e-mughan tujh se

ki shauq-e-sharb-e-mai hai mashrab-e-rindana rakhte hain

'nasir' ab hum ko kya hai qissa-e-kaunain se matlab

ki chashm-e-pur-fusun-e-yar ka afsana rakhte hain

'nasir' us shoKH se kahna ki pesh-e-chashm-e-hairat mein

tasawwur roz-o-shab tera hum ai jaanana rakhte hain