na-ashna-e-dard nahin bewafa nahin

nā-āshnā-e-dard nahīñ bevafā nahīñ

ik āshnā ki haa.e mirā āshnā nahīñ

lā.ūñ jo dil kī baat zabāñ par to kis liye

maiñ jāntā nahīñ huuñ ki tū jāntā nahīñ

jaltā rahā huuñ ziist ke dozaḳh meñ umr bhar

ye aur baat hai mirī koī ḳhatā nahīñ

ik sāġhar-e-hayāt kī ḳhātir tamām umr

vo kaun sā hai zahr jo maiñ ne piyā nahīñ

shāyad darūd-e-fasl-e-bahārāñ qarīb hai

ahl-e-junūñ ne chāk-e-garebāñ siyā nahīñ

husn-e-urūs-e-gul ki jamāl-e-saman-barāñ

duniyā meñ kuchh bhī zauq-e-nazar ke sivā nahīñ

tere harīm-e-nāz kī us ko ḳhabar ho kyā

jo sarhad-e-ḳhayāl se aage gayā nahīñ

'rif.at' jahāñ meñ rasm-e-vafā hī nahīñ rahī

un se to kyā kisī se bhī mujh ko gilā nahīñ

na-ashna-e-dard nahin bewafa nahin

ek aashna ki hae mera aashna nahin

laun jo dil ki baat zaban par to kis liye

main jaanta nahin hun ki tu jaanta nahin

jalta raha hun zist ke dozaKH mein umr bhar

ye aur baat hai meri koi KHata nahin

ek saghar-e-hayat ki KHatir tamam umr

wo kaun sa hai zahr jo main ne piya nahin

shayad darud-e-fasl-e-bahaaran qarib hai

ahl-e-junun ne chaak-e-gareban siya nahin

husn-e-urus-e-gul ki jamal-e-saman-baran

duniya mein kuchh bhi zauq-e-nazar ke siwa nahin

tere harim-e-naz ki us ko KHabar ho kya

jo sarhad-e-KHayal se aage gaya nahin

'rifat' jahan mein rasm-e-wafa hi nahin rahi

un se to kya kisi se bhi mujh ko gila nahin