na-fahmi apni parda hai didar ke liye

nā-fahmī apnī parda hai dīdār ke liye

varna koī naqāb nahīñ yaar ke liye

nūr-e-tajallī hai tire ruḳhsār ke liye

āñkheñ marī kalīm haiñ dīdār ke liye

fidye bahut us abrū-e-ḳhamdār ke liye

chū rang kī kamī nahīñ talvār ke liye

qaul apnā hai ye sub.ha-o-zunnār ke liye

do phande haiñ ye kāfir-o-dīñ-dār ke liye

lutf-e-chaman hai bulbul-e-gulzār ke liye

kaifīyat-e-sharāb hai mai-ḳhvār ke liye

serī na hogī tishna-e-dīdār ke liye

paanī nahīñ chah-e-zaqan-e-yār ke liye

utnī hī hai numūd mirī yaar ke liye

shohra hai jis qadar mare ash.ār ke liye

dasht-e-adam se aate haiñ bāġh-e-jahāñ meñ ham

be-dāġh lāla-o-gul-e-be-ḳhār ke liye

shamshād apne turre ko beche to lījiye

us laala ro kī lipaTtī dastār ke liye

do āñkheñ chehre par nahīñ tere faqīr ke

do Thekre haiñ bhiik ke dīdār ke liye

surma lagāyā kījiye āñkhoñ meñ mehrbāñ

iksīr ye sufūf hai bīmār ke liye

halqe meñ zulf-e-yār kī motī piroiye

dandāñ zarūr haiñ dahan-e-mār ke liye

guft-o-shunīd meñ huuñ basar din bahār ke

gul ke liye hai gosh zabāñ ḳhaar ke liye

be-yār sar paTakne se hiltā hai ghar mirā

rahtā hai zalzala dar-o-dīvār ke liye

baiThā jo us ke saa.e meñ dīvāna ho gayā

saaya parī kā hai tirī dīvār ke liye

bulbul hī ko bahār ke jaane kā ġham nahīñ

har barg haath maltā hai gulzār ke liye

ai shāh-e-husn zulf o ruḳh o gosh chashm o lab

kyā kyā ilāqe haiñ tirī sarkār ke liye

chaal abr kī chalā jo gulistāñ meñ jhuum kar

tā.ūs ne qadam tire rahvār ke liye

aayā jo dekhne tire husn-o-jamāl ko

pakḌā gayā vo ishq kī begār ke liye

hājat nahīñ banāo kī ai nāznīñ tujhe

zevar hai sādgī tire ruḳhsār ke liye

bīmār tandurust ho dekhe jo ro.e yaar

kyā chāshnī hai sharbat-e-dīdār ke liye

is bādshāh-e-husn kī manzil meñ chāhiye

bāl-e-humā kī par-chhatī dīvār ke liye

saudā-e-zulf-e-yār meñ kāfir huā huuñ meñ

sumbul ke taar chāhiyeñ zunnār ke liye

zanjīr o tauq jo ki hai bāzār-e-dahr meñ

saudā hai us parī ke ḳharīdār ke liye

chūnā baneñge ba.ad-e-fanā apne ustuḳhvāñ

daulat sarā.e yaar kī dīvār ke liye

ma.ashūq kī zabāñ se hai dushnām dil pazīr

shīrīnī zahr hai tirī guftār ke liye

jaañ se aziiz tar hai mare dil ko daaġh ishq

mahtāb lahad kī shab-e-tār ke liye

vo mast ḳhvāb chashm hai koī balā-e-bad

kyā martaba hai fitna-e-bedār ke liye

ḳhalvat se anjuman kā kahāñ yaar ko dimāġh

vo jins be-bahā nahīñ bāzār ke liye

pahnā hai jab se tū ne shab-e-māh meñ use

kyā kyā shagūfe phūlte haiñ haar ke liye

chhakḌā hue haiñ soch ke rāh-e-vafā meñ paañv

pahiye lagā.iye unheñ raftār ke liye

jo mushtarī hai banda hai us ḳhush-jamāl kā

yūsuf bane ġhulām ḳharīdār ke liye

sone ke patte hoveñ har ik gul ke kaan meñ

maqdūr ho jo bulbul-e-gulzār ke liye

gul-hā-e-zaḳhm se huuñ shahādat-talab nihāl

taufīq-e-ḳhair ho tirī talvār ke liye

andher hai jo dam kī na is ke ho raushnī

yūsuf mirā charāġh hai bāzār ke liye

ehsāñ jo ibtidā se hai ātish vahī hai aaj

kuchh intihā nahīñ karam-e-yār ke liye

na-fahmi apni parda hai didar ke liye

warna koi naqab nahin yar ke liye

nur-e-tajalli hai tere ruKHsar ke liye

aankhen mari kalim hain didar ke liye

fidye bahut us abru-e-KHamdar ke liye

chu rang ki kami nahin talwar ke liye

qaul apna hai ye subha-o-zunnar ke liye

do phande hain ye kafir-o-din-dar ke liye

lutf-e-chaman hai bulbul-e-gulzar ke liye

kaifiyat-e-sharab hai mai-KHwar ke liye

seri na hogi tishna-e-didar ke liye

pani nahin chah-e-zaqan-e-yar ke liye

utni hi hai numud meri yar ke liye

shohra hai jis qadar mare ashaar ke liye

dasht-e-adam se aate hain bagh-e-jahan mein hum

be-dagh lala-o-gul-e-be-KHar ke liye

shamshad apne turre ko beche to lijiye

us lala ro ki lipaTti dastar ke liye

do aankhen chehre par nahin tere faqir ke

do Thekre hain bhik ke didar ke liye

surma lagaya kijiye aankhon mein mehrban

iksir ye sufuf hai bimar ke liye

halqe mein zulf-e-yar ki moti piroiye

dandan zarur hain dahan-e-mar ke liye

guft-o-shunid mein hun basar din bahaar ke

gul ke liye hai gosh zaban KHar ke liye

be-yar sar paTakne se hilta hai ghar mera

rahta hai zalzala dar-o-diwar ke liye

baiTha jo us ke sae mein diwana ho gaya

saya pari ka hai teri diwar ke liye

bulbul hi ko bahaar ke jaane ka gham nahin

har barg hath malta hai gulzar ke liye

ai shah-e-husn zulf o ruKH o gosh chashm o lab

kya kya ilaqe hain teri sarkar ke liye

chaal abr ki chala jo gulistan mein jhum kar

taus ne qadam tere rahwar ke liye

aaya jo dekhne tere husn-o-jamal ko

pakDa gaya wo ishq ki begar ke liye

hajat nahin banao ki ai naznin tujhe

zewar hai sadgi tere ruKHsar ke liye

bimar tandurust ho dekhe jo roe yar

kya chashni hai sharbat-e-didar ke liye

is baadshah-e-husn ki manzil mein chahiye

baal-e-huma ki par-chhati diwar ke liye

sauda-e-zulf-e-yar mein kafir hua hun mein

sumbul ke tar chahiyen zunnar ke liye

zanjir o tauq jo ki hai bazar-e-dahr mein

sauda hai us pari ke KHaridar ke liye

chuna banenge baad-e-fana apne ustuKHwan

daulat sarae yar ki diwar ke liye

mashuq ki zaban se hai dushnam dil pazir

shirini zahr hai teri guftar ke liye

jaan se aziz tar hai mare dil ko dagh ishq

mahtab lahad ki shab-e-tar ke liye

wo mast KHwab chashm hai koi bala-e-bad

kya martaba hai fitna-e-bedar ke liye

KHalwat se anjuman ka kahan yar ko dimagh

wo jins be-baha nahin bazar ke liye

pahna hai jab se tu ne shab-e-mah mein use

kya kya shagufe phulte hain haar ke liye

chhakDa hue hain soch ke rah-e-wafa mein panw

pahiye lagaiye unhen raftar ke liye

jo mushtari hai banda hai us KHush-jamal ka

yusuf bane ghulam KHaridar ke liye

sone ke patte howen har ek gul ke kan mein

maqdur ho jo bulbul-e-gulzar ke liye

gul-ha-e-zaKHm se hun shahadat-talab nihaal

taufiq-e-KHair ho teri talwar ke liye

andher hai jo dam ki na is ke ho raushni

yusuf mera charagh hai bazar ke liye

ehsan jo ibtida se hai aatish wahi hai aaj

kuchh intiha nahin karam-e-yar ke liye