na-KHush jo ho gul-badan kisi ka

nā-ḳhush jo ho gul-badan kisī kā

kyā bhaa.e use suḳhan kisī kā

gul kī mujhe kyuuñ kalī dikhā.ī

yaad aa gayā phir dahan kisī kā

har sañg kī koh par sadā hai

yaañ dafn hai kohkan kisī kā

karte ho pasand vahshat-e-dil

le jāoge kyā hiran kisī kā

bhūlī hai sabā qabā-e-gul par

dekhā nahīñ pairahan kisī kā

āshiq hī ke jab na kaam aayā

kis kaam kā bāñkpan kisī kā

aa jaa.e kisī kī maut mujh ko

mil jaa.e mujhe kafan kisī kā

siine se hamārā dil na le jaao

chhuḌvāte ho kyuuñ vatan kisī kā

gaate haiñ 'saḳhī' hī kī ġhazal vo

bhātā hī nahīñ suḳhan kisī kā

na-KHush jo ho gul-badan kisi ka

kya bhae use suKHan kisi ka

gul ki mujhe kyun kali dikhai

yaad aa gaya phir dahan kisi ka

har sang ki koh par sada hai

yan dafn hai kohkan kisi ka

karte ho pasand wahshat-e-dil

le jaoge kya hiran kisi ka

bhuli hai saba qaba-e-gul par

dekha nahin pairahan kisi ka

aashiq hi ke jab na kaam aaya

kis kaam ka bankpan kisi ka

aa jae kisi ki maut mujh ko

mil jae mujhe kafan kisi ka

sine se hamara dil na le jao

chhuDwate ho kyun watan kisi ka

gate hain 'saKHi' hi ki ghazal wo

bhata hi nahin suKHan kisi ka