na-qabil-e-bayan KHataon se Dar gae

nā-qābil-e-bayān ḳhatāoñ se Dar ga.e

ye bhī huā hai log duāoñ se Dar ga.e

kyā kyā gumāñ na the hameñ dīvār-o-dar ke biich

ūñchā.iyoñ pe jā ke ḳhalāoñ se Dar ga.e

majme.a meñ kar rahe the jo be-ḳhaufiyoñ kī baat

tanhā hue to apnī sadāoñ se Dar ga.e

chiñgāriyoñ ke khel meñ dāman jalā liyā

bhaḌkī jo aag tez havāoñ se Dar ga.e

din kyā chaḌhā ki ho liye sūraj ke saath saath

sūraj-mukhī ke phuul shuāoñ se Dar ga.e

maa.il na dil huā kabhī insāf kī taraf

qaazī badan kī apnī qabāoñ se Dar ga.e

har har ḳhatā ko sarf-e-nazar kar diyā gayā

zālim ye sun ke apnī sazāoñ se Dar ga.e

ham tark-e-mai-kashī kā irāda na kar sake

mausam kī ḳhunkiyoñ se ghaTāoñ se Dar ga.e

'nāshir' hameñ bachātā rahā hai ḳhudā kā ḳhauf

Dhāle hue ḳhud apne ḳhudāoñ se Dar ga.e

na-qabil-e-bayan KHataon se Dar gae

ye bhi hua hai log duaon se Dar gae

kya kya guman na the hamein diwar-o-dar ke bich

unchaiyon pe ja ke KHalaon se Dar gae

majmea mein kar rahe the jo be-KHaufiyon ki baat

tanha hue to apni sadaon se Dar gae

chingariyon ke khel mein daman jala liya

bhaDki jo aag tez hawaon se Dar gae

din kya chaDha ki ho liye suraj ke sath sath

suraj-mukhi ke phul shuaon se Dar gae

mail na dil hua kabhi insaf ki taraf

qazi badan ki apni qabaon se Dar gae

har har KHata ko sarf-e-nazar kar diya gaya

zalim ye sun ke apni sazaon se Dar gae

hum tark-e-mai-kashi ka irada na kar sake

mausam ki KHunkiyon se ghaTaon se Dar gae

'nashir' hamein bachata raha hai KHuda ka KHauf

Dhaale hue KHud apne KHudaon se Dar gae