na-rawa kahiye na-saza kahiye

nā-ravā kahiye nā-sazā kahiye

kahiye kahiye mujhe burā kahiye

tujh ko bad-ahd o bevafā kahiye

aise jhūTe ko aur kyā kahiye

dard dil kā na kahiye yā kahiye

jab vo pūchhe mizāj kyā kahiye

phir na rukiye jo mudda.ā kahiye

ek ke ba.ad dūsrā kahiye

aap ab merā muñh na khulvā.eñ

ye na kahiye ki mudda.ā kahiye

vo mujhe qatl kar ke kahte haiñ

māntā hī na thā ye kyā kahiye

dil meñ rakhne kī baat hai ġham-e-ishq

is ko hargiz na barmalā kahiye

tujh ko achchhā kahā hai kis kis ne

kahne vāloñ ko aur kyā kahiye

vo bhī sun leñge ye kabhī na kabhī

hāl-e-dil sab se jā-ba-jā kahiye

mujh ko kahiye burā na ġhair ke saath

jo ho kahnā judā judā kahiye

intihā ishq kī ḳhudā jaane

dam-e-āḳhir ko ibtidā kahiye

mere matlab se kyā ġharaz matlab

aap apnā to mudda.ā kahiye

aisī kashtī kā Dūbnā achchhā

ki jo dushman ko nāḳhudā kahiye

sabr furqat meñ aa hī jaatā hai

par use der-āshnā kahiye

aa ga.ī aap ko masīhā.ī

marne vāloñ ko marhabā kahiye

aap kā ḳhair-ḳhvāh mere sivā

hai koī aur dūsrā kahiye

haath rakh kar vo apne kānoñ par

mujh se kahte haiñ mājrā kahiye

hosh jaate rahe raqīboñ ke

'dāġh' ko aur bā-vafā kahiye

na-rawa kahiye na-saza kahiye

kahiye kahiye mujhe bura kahiye

tujh ko bad-ahd o bewafa kahiye

aise jhuTe ko aur kya kahiye

dard dil ka na kahiye ya kahiye

jab wo puchhe mizaj kya kahiye

phir na rukiye jo muddaa kahiye

ek ke baad dusra kahiye

aap ab mera munh na khulwaen

ye na kahiye ki muddaa kahiye

wo mujhe qatl kar ke kahte hain

manta hi na tha ye kya kahiye

dil mein rakhne ki baat hai gham-e-ishq

is ko hargiz na barmala kahiye

tujh ko achchha kaha hai kis kis ne

kahne walon ko aur kya kahiye

wo bhi sun lenge ye kabhi na kabhi

haal-e-dil sab se ja-ba-ja kahiye

mujh ko kahiye bura na ghair ke sath

jo ho kahna juda juda kahiye

intiha ishq ki KHuda jaane

dam-e-aKHir ko ibtida kahiye

mere matlab se kya gharaz matlab

aap apna to muddaa kahiye

aisi kashti ka Dubna achchha

ki jo dushman ko naKHuda kahiye

sabr furqat mein aa hi jata hai

par use der-ashna kahiye

aa gai aap ko masihai

marne walon ko marhaba kahiye

aap ka KHair-KHwah mere siwa

hai koi aur dusra kahiye

hath rakh kar wo apne kanon par

mujh se kahte hain majra kahiye

hosh jate rahe raqibon ke

'dagh' ko aur ba-wafa kahiye