nahaq o haq ka unhen KHauf-o-KHatar kuchh bhi nahin

nāhaq o haq kā unheñ ḳhauf-o-ḳhatar kuchh bhī nahīñ

be-ḳhabar haiñ vo zamāne kī ḳhabar kuchh bhī nahīñ

dhuum hī dhuum thī madfan kī magar kuchh bhī nahīñ

ḳhaak is ghar meñ basar hogī ye ghar kuchh bhī nahīñ

haa.e afsos huī kaun sī sohbat barḳhāst

shab ko me.arāj meñ the vaqt-e-sahar kuchh bhī nahīñ

kah rahī hai ye mare dil se mohabbat us kī

huuñ to iksīr magar mujh meñ asar kuchh bhī nahīñ

aa rahī hai ye sadā gor ke sannāTe se

maiñ vo aalam huuñ jahāñ shām-o-sahar kuchh bhī nahīñ

is nazākat se to maiñ kaahe ko bismil hūñgā

tum chhurī pherte ho mujh ko ḳhabar kuchh bhī nahīñ

hātif-e-ishq to kahtā hai idhar sab kuchh hai

ālam-e-yās ye kahtā hai udhar kuchh bhī nahīñ

aañkh phir jaatī hai māshūqoñ kī māyūsoñ se

ġham-zada kuchh nahīñ hasrat kī nazar kuchh bhī nahīñ

turbat-e-qais se kahtī hai lipaT kar lailā

ham taḌapte haiñ paḌe tum ko ḳhabar kuchh bhī nahīñ

manzil-e-gor meñ kyā jāniye kyā guzregī

taaza vārid haiñ abhī ham ko ḳhabar kuchh bhī nahīñ

lan-tarānī kī jo tākīd hai ai dil ye khulā

bāb-e-dīdār meñ manzūr-e-nazar kuchh bhī nahīñ

ḳhvāb dekhā thā ki thā vasl kī shab kā sāmān

jashn thā raat ko hañgām-e-sahar kuchh bhī nahīñ

us ko gahrī ise ye ochhī chhurī vaah ai yaar

zaḳhm-e-dil ghaav huā zaḳhm-e-jigar kuchh bhī nahīñ

rishta-e-jāñ se bhī nāzuk hai vo bārīkī meñ

gul kī rag phir hai gudāz us kī kamar kuchh bhī nahīñ

qabr meñ hūroñ ke aane kā uThā.eñ kyā lutf

diida o jism o dil o jaan o jigar kuchh bhī nahīñ

raas aa jā.egī jis ko vo use chāheñge

phir mohabbat meñ sabhī kuchh hai agar kuchh bhī nahīñ

mutma.in huuñ rah-e-isyāñ meñ tirī rahmat se

vo musāfir huuñ ki tashvīsh-e-safar kuchh bhī nahīñ

ai 'sharaf' hai gul-e-maqsūd ke har-sū bauchhār

vaah ai ḳhūbi-e-qismat ki idhar kuchh bhī nahīñ

nahaq o haq ka unhen KHauf-o-KHatar kuchh bhi nahin

be-KHabar hain wo zamane ki KHabar kuchh bhi nahin

dhum hi dhum thi madfan ki magar kuchh bhi nahin

KHak is ghar mein basar hogi ye ghar kuchh bhi nahin

hae afsos hui kaun si sohbat barKHast

shab ko mearaj mein the waqt-e-sahar kuchh bhi nahin

kah rahi hai ye mare dil se mohabbat us ki

hun to iksir magar mujh mein asar kuchh bhi nahin

aa rahi hai ye sada gor ke sannaTe se

main wo aalam hun jahan sham-o-sahar kuchh bhi nahin

is nazakat se to main kahe ko bismil hunga

tum chhuri pherte ho mujh ko KHabar kuchh bhi nahin

hatif-e-ishq to kahta hai idhar sab kuchh hai

aalam-e-yas ye kahta hai udhar kuchh bhi nahin

aankh phir jati hai mashuqon ki mayuson se

gham-zada kuchh nahin hasrat ki nazar kuchh bhi nahin

turbat-e-qais se kahti hai lipaT kar laila

hum taDapte hain paDe tum ko KHabar kuchh bhi nahin

manzil-e-gor mein kya jaaniye kya guzregi

taza warid hain abhi hum ko KHabar kuchh bhi nahin

lan-tarani ki jo takid hai ai dil ye khula

bab-e-didar mein manzur-e-nazar kuchh bhi nahin

KHwab dekha tha ki tha wasl ki shab ka saman

jashn tha raat ko hangam-e-sahar kuchh bhi nahin

us ko gahri ise ye ochhi chhuri wah ai yar

zaKHm-e-dil ghaw hua zaKHm-e-jigar kuchh bhi nahin

rishta-e-jaan se bhi nazuk hai wo bariki mein

gul ki rag phir hai gudaz us ki kamar kuchh bhi nahin

qabr mein huron ke aane ka uThaen kya lutf

dida o jism o dil o jaan o jigar kuchh bhi nahin

ras aa jaegi jis ko wo use chahenge

phir mohabbat mein sabhi kuchh hai agar kuchh bhi nahin

mutmain hun rah-e-isyan mein teri rahmat se

wo musafir hun ki tashwish-e-safar kuchh bhi nahin

ai 'sharaf' hai gul-e-maqsud ke har-su bauchhaar

wah ai KHubi-e-qismat ki idhar kuchh bhi nahin