nakaam-e-nashat-e-aish-o-KHushi har waqt ke ranj-o-gham ne kiya

nākām-e-nashāt-e-aish-o-ḳhushī har vaqt ke ranj-o-ġham ne kiyā

jo tum ne kahā vo dil ne kiyā jo dil ne kahā vo ham ne kiyā

ye haal hai mere marqad kā 'ālam hai ye mere madfan par

sarsar ne kisī din jhāḌū dī chhiḌkāv kabhī shabnam ne kiyā

furqat meñ hazāroñ zulm sahe ulfat meñ hazāroñ rañj diye

kyā ham ne kiyā kyā tum ne kiyā ye tum ne kiyā vo ham ne kiyā

āñkhoñ se bahe miTTī meñ mile ahbāb ko parvā kuchh na huī

mātam mire ik ik aañsū kā mizhgāñ kī saf-e-mātam ne kiyā

ab koī use fariyād kahe yā koī use shikva samjhe

ham ko jo satāyā bandoñ ne to shukr ḳhudā kā ham ne kiyā

yuuñ aap bigaḌne ko bigḌeñ lekin ye zarā socheñ samjheñ

kyā sirf hamīñ ne 'ishq kiyā duniyā ne kiyā 'ālam ne kiyā

ye tum ne kiyā ye tum ne sunā ye tum ne kahā ye kaun kahe

vo pūchhte haiñ kyā ham ne kahā kyā ham ne sunā kyā ham ne kiyā

hasrat ko bhī hasrat aatī hai 'ibrat ko bhī 'ibrat aatī hai

vo shakl hamārī ġham meñ huī ye haal hamārā ġham ne kiyā

duniyā ko Duboyā ashkoñ se tūfān uThāyā ro ro kar

dariyā-e-ġham ulfat meñ bapā ai 'nūh' talātum ham ne kiyā

nakaam-e-nashat-e-aish-o-KHushi har waqt ke ranj-o-gham ne kiya

jo tum ne kaha wo dil ne kiya jo dil ne kaha wo hum ne kiya

ye haal hai mere marqad ka 'alam hai ye mere madfan par

sarsar ne kisi din jhaDu di chhiDkaw kabhi shabnam ne kiya

furqat mein hazaron zulm sahe ulfat mein hazaron ranj diye

kya hum ne kiya kya tum ne kiya ye tum ne kiya wo hum ne kiya

aankhon se bahe miTTi mein mile ahbab ko parwa kuchh na hui

matam mere ek ek aansu ka mizhgan ki saf-e-matam ne kiya

ab koi use fariyaad kahe ya koi use shikwa samjhe

hum ko jo sataya bandon ne to shukr KHuda ka hum ne kiya

yun aap bigaDne ko bigDen lekin ye zara sochen samjhen

kya sirf hamin ne 'ishq kiya duniya ne kiya 'alam ne kiya

ye tum ne kiya ye tum ne suna ye tum ne kaha ye kaun kahe

wo puchhte hain kya hum ne kaha kya hum ne suna kya hum ne kiya

hasrat ko bhi hasrat aati hai 'ibrat ko bhi 'ibrat aati hai

wo shakl hamari gham mein hui ye haal hamara gham ne kiya

duniya ko Duboya ashkon se tufan uThaya ro ro kar

dariya-e-gham ulfat mein bapa ai 'nuh' talatum hum ne kiya