nakaam hi dil jo rahna tha nakaam raha achchha hi hua

nākām hī dil jo rahnā thā nākām rahā achchhā hī huā

ab kiije kisī kā shikva kyā jo kuchh bhī huā achchhā hī huā

kuchh manzil kā ġham baḌh jaatā kuchh rāheñ mushkil ho jātīñ

is taptī dhuup meñ zulfoñ kā saaya na milā achchhā hī huā

ab rāh-e-vafā ke patthar ko ham phuul nahīñ samjheñge kabhī

pahle hī qadam par Thes lagī dil TuuT gayā achchhā hī huā

do chaar ghaḌī hañs-bol ke ham barsoñ ḳhuuñ ke aañsū rote

do chaar ghaḌī bhī bazm-e-tarab meñ jī na lagā achchhā hī huā

in jaadū karne vāloñ ke kuchh bhed samajh meñ aa to ga.e

dil pyaar ke pīchhe pāgal thā nākām rahā achchhā hī huā

do ghūñT se apnī tishna-labī kyā kam hotī kyuuñ kam hotī

chhalkā huā sāġhar hāthoñ se gir kar TuuTā achchhā hī huā

har vaqt ḳhizāñ ke jhoñkoñ se Darte rahte ham bhī 'manzar'

siine meñ kabhī armānoñ kā ġhuncha na khilā achchhā hī huā

nakaam hi dil jo rahna tha nakaam raha achchha hi hua

ab kije kisi ka shikwa kya jo kuchh bhi hua achchha hi hua

kuchh manzil ka gham baDh jata kuchh rahen mushkil ho jatin

is tapti dhup mein zulfon ka saya na mila achchha hi hua

ab rah-e-wafa ke patthar ko hum phul nahin samjhenge kabhi

pahle hi qadam par Thes lagi dil TuT gaya achchha hi hua

do chaar ghaDi hans-bol ke hum barson KHun ke aansu rote

do chaar ghaDi bhi bazm-e-tarab mein ji na laga achchha hi hua

in jadu karne walon ke kuchh bhed samajh mein aa to gae

dil pyar ke pichhe pagal tha nakaam raha achchha hi hua

do ghunT se apni tishna-labi kya kam hoti kyun kam hoti

chhalka hua saghar hathon se gir kar TuTa achchha hi hua

har waqt KHizan ke jhonkon se Darte rahte hum bhi 'manzar'

sine mein kabhi armanon ka ghuncha na khila achchha hi hua