nala-e-ijz naqs-e-ulfat hai

nāla-e-ijz naqs-e-ulfat hai

anj-o-mehnat kamāl rāhat hai

ishq hī girya-e-nadāmat hai

varna āshiq ko chashm-e-ḳhiffat hai

tā dam-e-marg ġham ḳhushī kā nahīñ

dil-e-āzurda gar salāmat hai

dil meñ nāsūr phir jidhar chāhe

har taraf kūcha-e-jarrāhat hai

ronā aatā hai dam-ba-dam shāyad

kaso hasrat kī dil se ruḳhsat hai

fitne rahte haiñ us ke saa.e meñ

qad-o-qāmat tirā qayāmat hai

na tujhe rahm ne use Tuk sabr

dil pe mere ajab musībat hai

tū to nādān hai nipaT nāseh

kab mo.assir tirī nasīhat hai

dil pe jab mere aa ke ye Thahrā

ki mujhe ḳhush-dilī aziyyat hai

ranj-o-mehnat se baaz kyūñke rahūñ

vaqt jaatā rahe to hasrat hai

kyā hai phir koī dam ko kyā jaano

dam ġhanīmat miyāñ jo fursat hai

terā shikva mujhe na merā tujhe

chāhiye yuuñ jo fil-haqīqat hai

tujh ko masjid hai mujh ko mai-ḳhāna

vā.izā apnī apnī qismat hai

aise hañsmukh ko sham.a se tashbīh

sham.a-e-majlis kī ronī sūrat hai

bātil-us-sehr dekh bātil the

terī āñkhoñ kā sehr aafat hai

abr-e-tar ke huzūr phuuT bahā

dīda-e-tar ko mere rahmat hai

gaah nālāñ tapāñ gahe be-dam

dil kī mere ajab hī hālat hai

kyā huā gar ġhazal qasīda huī

āqibat qissa-e-mohabbat hai

turbat-e-'mīr' par haiñ ahl-e-suḳhan

har taraf harf hai hikāyat hai

tū bhī taqrīb-e-fātiha se chal

ba-ḳhudā vājibuzziyārat hai

nala-e-ijz naqs-e-ulfat hai

anj-o-mehnat kamal rahat hai

ishq hi girya-e-nadamat hai

warna aashiq ko chashm-e-KHiffat hai

ta dam-e-marg gham KHushi ka nahin

dil-e-azurda gar salamat hai

dil mein nasur phir jidhar chahe

har taraf kucha-e-jarrahat hai

rona aata hai dam-ba-dam shayad

kaso hasrat ki dil se ruKHsat hai

fitne rahte hain us ke sae mein

qad-o-qamat tera qayamat hai

na tujhe rahm ne use Tuk sabr

dil pe mere ajab musibat hai

tu to nadan hai nipaT naseh

kab moassir teri nasihat hai

dil pe jab mere aa ke ye Thahra

ki mujhe KHush-dili aziyyat hai

ranj-o-mehnat se baz kyunke rahun

waqt jata rahe to hasrat hai

kya hai phir koi dam ko kya jaano

dam ghanimat miyan jo fursat hai

tera shikwa mujhe na mera tujhe

chahiye yun jo fil-haqiqat hai

tujh ko masjid hai mujh ko mai-KHana

waiza apni apni qismat hai

aise hansmukh ko shama se tashbih

shama-e-majlis ki roni surat hai

baatil-us-sehr dekh baatil the

teri aankhon ka sehr aafat hai

abr-e-tar ke huzur phuT baha

dida-e-tar ko mere rahmat hai

gah nalan tapan gahe be-dam

dil ki mere ajab hi haalat hai

kya hua gar ghazal qasida hui

aaqibat qissa-e-mohabbat hai

turbat-e-'mir' par hain ahl-e-suKHan

har taraf harf hai hikayat hai

tu bhi taqrib-e-fatiha se chal

ba-KHuda wajibuzziyarat hai