نالہ رکتا ہے تو سر گرم جفا ہوتا ہے

نالہ رکتا ہے تو سر گرم جفا ہوتا ہے

درد تھمتا ہے تو بے درد خفا ہوتا ہے

پھر نظر جھینپتی ہے آنکھ جھکی جاتی ہے

دیکھیے دیکھیے پھر تیر خطا ہوتا ہے

عشق میں حسرت دل کا تو نکلنا کیسا

دم نکلنے میں بھی کم بخت مزا ہوتا ہے

حال دل ان سے نہ کہتا تھا ہمیں چوک گئے

اب کوئی بات بنائیں بھی تو کیا ہوتا ہے

آہ میں کچھ بھی اثر ہو تو شرر بار کہوں

ورنہ شعلہ بھی حقیقت میں ہوا ہوتا ہے

ہجر میں نالہ و فریاد سے باز آ رسواؔ

ایسی باتوں سے وہ بے درد خفا ہوتا ہے