nam bhi achchha sa tha chehra bhi tha mahtab sa

naam bhī achchhā sā thā chehra bhī thā mahtāb sā

haañ hameñ kuchh yaad hotā hai magar kuchh ḳhvāb sā

ye mire siine meñ dil rakkhā hai yā koī chakor

chāñdnī rātoñ meñ kyuuñ rahtā huuñ maiñ betāb sā

ho gayā kis zikr se ye murta.ish saarā vajūd

tār-e-sāz-e-dil pe āḳhir kyā lagā mizrāb sā

kuchh kitābeñ aur qalam kāġhaz ke kuchh purzoñ pe sher

mere ghar meñ hai yahī bas qīmtī asbāb sā

paañv rakhte hī bahā kar le gayā sailāb meñ

duur se lagtā thā jo dariyā hameñ pāyāb sā

is tarah ke kuchh havārī saath iisā ke bhī the

jis tarah hai gird mere halqa-e-ahbāb sā

āsmāñ par aañkh sūraj kī na bujh jaa.e kahīñ

hai zamīñ par raushnī kā is qadar sailāb sā

nam bhi achchha sa tha chehra bhi tha mahtab sa

han hamein kuchh yaad hota hai magar kuchh KHwab sa

ye mere sine mein dil rakkha hai ya koi chakor

chandni raaton mein kyun rahta hun main betab sa

ho gaya kis zikr se ye murtaish sara wajud

tar-e-saz-e-dil pe aaKHir kya laga mizrab sa

kuchh kitaben aur qalam kaghaz ke kuchh purzon pe sher

mere ghar mein hai yahi bas qimti asbab sa

panw rakhte hi baha kar le gaya sailab mein

dur se lagta tha jo dariya hamein payab sa

is tarah ke kuchh hawari sath isa ke bhi the

jis tarah hai gird mere halqa-e-ahbab sa

aasman par aankh suraj ki na bujh jae kahin

hai zamin par raushni ka is qadar sailab sa