naseho dil kis kane hai kis ko samjhate ho tum

nāseho dil kis kane hai kis ko samjhāte ho tum

kyuuñ divāne ho ga.e ho jaan kyuuñ khāte ho tum

mujh se kahte ho ki maiñ hargiz nahīñ piitā sharāb

maiñ tumhārā dost yā dushman ki sharmāte ho tum

aur jo baiThe raheñ to un se tum mahzūz ho

jab hamīñ aate haiñ to ghabrā ke uTh jaate ho tum

lo jī ab ārām se baiThe raho jaate haiñ ham

phir na āveñge kabhī kaahe ko jhunjhlāte ho tum

raat ko tum jis jagah the ham ko sab mālūm hai

jhuuT kyuuñ bakte ho kaahe ko qasam khāte ho tum

muñh banā merī taraf ā.īne kā bosa liyā

vaah vā achchhī tarah se roz Dahkāte ho tum

ek to maiñ aap huuñ be-zār apnī jaan se

dūsre bak bak ke mere jī ko ghabrāte ho tum

ai kabūtar ai sabā ai naala ai fariyād aaj

kahiyo dilbar se agar kūche talak jaate ho tum

'soz' kā dil ḳhush to ho jaatā hai vādoñ se miyāñ

par ġhazab ye hai ki vaqt hī par mukar jaate ho tum

naseho dil kis kane hai kis ko samjhate ho tum

kyun diwane ho gae ho jaan kyun khate ho tum

mujh se kahte ho ki main hargiz nahin pita sharab

main tumhaara dost ya dushman ki sharmate ho tum

aur jo baiThe rahen to un se tum mahzuz ho

jab hamin aate hain to ghabra ke uTh jate ho tum

lo ji ab aaram se baiThe raho jate hain hum

phir na aawenge kabhi kahe ko jhunjhlate ho tum

raat ko tum jis jagah the hum ko sab malum hai

jhuT kyun bakte ho kahe ko qasam khate ho tum

munh bana meri taraf aaine ka bosa liya

wah wa achchhi tarah se roz Dahkate ho tum

ek to main aap hun be-zar apni jaan se

dusre bak bak ke mere ji ko ghabraate ho tum

ai kabutar ai saba ai nala ai fariyaad aaj

kahiyo dilbar se agar kuche talak jate ho tum

'soz' ka dil KHush to ho jata hai wadon se miyan

par ghazab ye hai ki waqt hi par mukar jate ho tum