nash us aashiq-e-nashad ki uThwane do

na.ash us āshiq-e-nāshād kī uThvāne do

ab use zer-e-zamīñ chain se so jaane do

dil bahal jaa.e to tanhā.ī kī kulfat bhī miTe

shab-e-furqat kī balāoñ ko to aa jaane do

saiñkaḌoñ gauhar-e-nāyāb to paidā hoñge

chand jhāle mirī āñkhoñ se baras jaane do

be kafan pheñk hī denā mire lāshe ko magar

kūcha-e-pāk meñ mahbūb ke mar jaane do

liye baiThā huuñ bayābān meñ pahlū ḳhālī

kyā milā.e haiñ junūñ tū ne ye vīrāne do

mai kī hājat na kabhī mujh ko rahī ai saaqī

ḳhuuñ se labrez haiñ un āñkhoñ ke paimāne do

sham.a-rū jaañ bhī huī dil bhī huā tujh pe fidā

jal ga.e ishq ke hāthoñ se ye parvāne do

saath mere dil-e-nāshād hai tanhā maiñ nahīñ

aa.e haiñ dar pe shah-e-dīñ tire dīvāne do

saath us zulf ke uljhe na hamārī qismat

ab ise tum dil-e-sad-chāk se suljhāne do

hogā pur-nūr siyah-ḳhāna hamāre dil kā

is meñ tum ġhaus-e-ḳhudā ko zarā aa jaane do

rah chukā dair-o-kalīsā meñ bahut muddat tak

ai junūñ sū-e-haram ab to mujhe jaane do

un ke fiqroñ meñ na ā.eñge ye sachche āshiq

vaa.iz aa.e haiñ jo samjhāne to samjhāne do

faḳhr hai naaz hai us par to 'jamīla' mujh ko

tum sag-kū-e-jamālī mujhe kahlāne do

nash us aashiq-e-nashad ki uThwane do

ab use zer-e-zamin chain se so jaane do

dil bahal jae to tanhai ki kulfat bhi miTe

shab-e-furqat ki balaon ko to aa jaane do

sainkaDon gauhar-e-nayab to paida honge

chand jhaale meri aankhon se baras jaane do

be kafan phenk hi dena mere lashe ko magar

kucha-e-pak mein mahbub ke mar jaane do

liye baiTha hun bayaban mein pahlu KHali

kya milae hain junun tu ne ye virane do

mai ki hajat na kabhi mujh ko rahi ai saqi

KHun se labrez hain un aankhon ke paimane do

shama-ru jaan bhi hui dil bhi hua tujh pe fida

jal gae ishq ke hathon se ye parwane do

sath mere dil-e-nashad hai tanha main nahin

aae hain dar pe shah-e-din tere diwane do

sath us zulf ke uljhe na hamari qismat

ab ise tum dil-e-sad-chaak se suljhane do

hoga pur-nur siyah-KHana hamare dil ka

is mein tum ghaus-e-KHuda ko zara aa jaane do

rah chuka dair-o-kalisa mein bahut muddat tak

ai junun su-e-haram ab to mujhe jaane do

un ke fiqron mein na aaenge ye sachche aashiq

waiz aae hain jo samjhane to samjhane do

faKHr hai naz hai us par to 'jamila' mujh ko

tum sag-ku-e-jamali mujhe kahlane do